Welcoem to posts!!
in the future - u will be able to do some more stuff here,,,!! like pat catgirl- i mean um yeah... for now u can only see others's posts :c
مساء الخير...
باجهز الان فيديو الاحد القادم ان شاء الله حيكون عن الاولويات، لكن طلع طويل ٣٠ دقيقة،، ممكن اقسمه على ٢...
هو قابل للتقسيم الى حد ما، فهل الافضل اقسمه علشان الطول ولا اخلي الموضوع على بعضه احسن؟
شاكرة لكم رأيكم جدا 🥰
انجي ⚘
105 - 38
صباح الخير...
هل قررتم أهدافكم للسنة دي؟
علشان نقدر نحدد أهدافنا بفاعلية ونرتب أولوياتنا خلونا نلعب لعبة بسيطة..
ايه هو المجال اللي حتركزوا عليه الأول؟ ممكن يكون هو محور تركيزكم السنة كلها أو هو الاول ويليه آخرين بمجرد ما تحققوا فيه خطوات حلوة.
التصويت ده غير متاح فيه اختيار أكتر من عنصر واحد، وده مقصود علشان يجبرنا نرتب أولوياتها ونختار.
**لاعتبارات المساحات المتاحة على يوتيوب الاختيارات في التصويت مقتصرة على 5 فقط، المجال السادس المهم أخذه في الاعتبار هو ترتيب البيت والمحيط بصفة عامة.. فإذا كان هذا اختياركم اكتبوه مباشرة في التعليقات**
إذا فيه أكتر من شيئ لهم نفس المكانة عندكم، ما تفكروش كتير، الإجابة اللي حتخطر على بالكم الاول هي اللي تختاروها، عقلنا الباطن قادر يميز الأولويات أكتر من عقلنا الواعي... وهو ده الهدف اللي حنركز عليه الربع الأول من السنة، أو الشهر الأول فقط لو تحبوا.. المهم أن ده محور تركيزنا حاليا... وخلينا فاكرين:
1- أهدافنا كلها مهمة
2- مش معنى اني اختار أولوية الآن ان الباقي مش مهم أو إني اهمله
3- اختيار الأولوية معناه التركيز عليها والباقي يمشي في الحد الأدنى حاليا إذا كان ضروري
4- بالتركيز على شيئ واحد اتقنه، واول ما اخلص حاجي للي وراه، مش باهمل أهدافي
5- ..... نقدر نعمل كل حاجة إن شاء الله، بس على التوالي مش بالتوازي... جربوا المرة دي..
إذا اخترتم مجال أو هدف مش في القائمة اكتبولي في التعليقات..
آخر السنة إن شاء الله حنرجع للتصويت ده ونشوف عملنا ايه.. وليه؟
فيديوهات عن اختيار وتخطيط الأهداف ببساطة: www.youtube.com/channel/UCfM-...
سنة سعيدة..
انجي 🌷
107 - 47
صباح الخير....
لفت نظري بعد فيديو مراجعة أهدافي السنة اللي فاتت تعليق من كذا حد على أهدافي وإزاي ان كان فيها حاجات بسيطة زي ترتيب أرداج في البيت، واني اعتبرت تنفيذها انجاز.. فحبيت أوضح نقطة مهمة جدا هنا..
الهدف هو أي شيئ "قررت" إني محتاجة أعمله لأنه حيخلي حياتي "أفضل" ولو خطوة واحدة.. بالمنطق ده الحصول على الدكتوراة في نفس أهمية ترتيب غرفة في البيت (الفرق بينهم الحجم، واحد بسيط، تأثيره فوري وبيتعمل بخطوات قليلة، وواحد مركب، تأثيره كبير لكن بييجي متأخر) لان المشروعين أو الهدفين بينطبق عليهم المعيارين الأساسيين، أولا أنهم حيحسنوا حياتي، وثانيا اني باعملهم "بقرار واعي" عن عمد، ودي النقطة اللي ناس كتير مش بتاخد بالها منها..
الهدف هو كل ما قررت عمله "عن عمد"، مش متساب للظروف.. ايا كان هو ايه.. حتى لو نازلة اشتري طلبات البيت من محل، فده هدف الأسبوع، وهو هدف ومهم ويستحق اخصص له وقت.
لا تستهينوا بأهدافكم.. وتأكدوا ان اي يوتيوبر بيعمل فيديوهات عن أهدافه وبيتكلم فيه عن مشاريع كبيرة، فهو برضه عنده اهدافه الصغيرة البسيطة، لكن يمكن ما فكرش يعرضها لأنه برضه فكر انها مش مستاهلة أو انها سهلة كل الناس تقدر على تخطيطها..
لا تستهينوا بأهدافكم لمجرد انها مش ضمن أهداف شخص آخر.. ببساطة الأهداف الصغيرة دي هي الأساس، هي اللي بترتب حياتنا علشان نقدر بعدها ننطلق لأهداف أكبر حجما -لو عايزين اصلا-.. واللي بيحط أهداف لمشاريع كبيرة دلوقتي في يوم بدأ بمشاريع صغيرة جدا وعادات بسيطة جدا...
لا تستهينوا بأهدافكم لان حياتكم مش هيّنة، وتستحق العمل عليها بخطوات بسيطة، تراكمية، لما تنظروا لها في النهاية حتستغربوا إزاي اتنقلت النقلة الكبيرة دي.. ترتيب الدواليب رف واحد كل مرة، بيعمل فرق، زي ما دراسة تخصص جديد للعمل بتعمل فرق.. الفرق بينهم الحجم والوقت..
لا تستهينوا بأهدافكم لانها فعلا تستحق.
* أول دقيقة ونص في الفيديو ده باشرح فيه يعني ايه هدف، وإزاي نفصصه خطوات بسيطة ونوصل له بسهولة...
.
72 - 14
صباح الخير...
كل سنة وأنتم طيبين.. موسم الأجندات بدأ وزي ما وعدتكم أجندات 2024 جاهزة للتحميل.. موجودة هنا:
drive.google.com/drive/folders/1P7Wgg5Fl2y4-FNciMw…
الأجندة السنوية، الأجندة الشهرية (شهر واحد و٣ شهور)، شكلين من الكتيب الفارغ، وورقة ختام العام..
تمنياتي بعام جديد سعيد🎉 ❤
انجي 🌹
-------
تحديث:
فيديو طريقة طباعة وقص الأجندة: https://youtu.be/puoGhQ5VeSo?si=fAFO4...
إزاي باستخدمها: https://youtu.be/Sg3YnEhfLFM?si=nvpdK...
318 - 89
لو تعرفوا معاناتي يوم السبت اللي فات علشان اعمل الفيديو!
كان احتمال كبير فيديو الأحد ما يطلعش بسبب مشكلة في المونتاج، من ١٠ الصبح لحد ٨ بالليل بحاول انفذ الفيديو ومش راضي يتحمل صح...
كان هدفي الشهر ده اني ارجع اعمل فيديو واحد كل شهر، وحتى الهدف ده كان ممكن ما يتنفذش لظروف خارجة عن ارادتي، في الحالة دي كنت حأجل المعاد، وده من الاسباب اللي خليتني بدأت بالراحة وبالتدريج، فيديو واحد في الشهر مش صعب، ممكن التنفيذ، حتى مع مشاكل تقنية، وممكن ينجح واقدر اطلع ٢ في الشهر.. المرونة هنا هي المفتاح..
ايه الهدف اللي بيتعطل لظروف خارجة عن اراداتك؟
وإزاي حتتعامل مع المشكلة دي؟
خلينا نعمل سوا تحدي أكتوبر السنة دي ونلقي نظرة على أهداف وقفت بسبب المشاكل الخارجة عن ارادتنا، ونشوف.. هل هي فعلا خارجة عن ارادتنا؟ طب ايه اللي ممكن اعمله؟
السؤال ده فخ على فكرة... فكروا كويس....
241 - 70
صباح الخير...
كل سنة وأنتم طيبين.. يا رب تكونوا قضيتم شهر جميل، يريح قلوبكم وبالكم.. وإن شاء الله عيد سعيد عليكم...
نهاية شهر رمضان اعتبرتها النهاية الفعلية للربع الأول من السنة، وبابدأ دلوقتي اعمل مراجعة اول ٣ شهور.. الحقيقة انا كنت ضاغطة نفسي جامد ومتوترة في محاولة اني افكر في حلول للحاجات اللي انا متعطلة فيها من أول السنة، وده ضغطني اكتر وخلاني اتعطلت اكتر لان مع التوتر ماكنتش بافكر بشكل صحيح.. فقررت ان رمضان حيكون شهر الراحة من كل ده... اني حابطل اتحرك في الأهداف بتاعتي شوية وارتاح حتى منها واركز اكتر اني استمتع بالشهر الكريم ده... واتفاجئت على نص الشهر اني رجعت منغير ما احس لأهدافي تاني لكن المرة دي بنتائج افضل كتير..
ساعات المشكلة كلها اننا ضاغطين نفسنا ومحتاجين راحة...
عملتم مراجعتكم ولا لسه؟
على فكرة،، مش لازم تكون بتحط أهداف اصلا علشان تقف كل فترة وتقيم حياتك ماشية ازاي...
كل سنة وانت طيبين ❤
انجي 🌹
285 - 59
صباح الخير...
عارفة اني وعدتكم بالجزء الثاني من فيديو أهداف 2022 النهاردة، لكن للاسف حصلت مشكلة في المونتاج بحاول احلها، واحتمال اضطر لإعادة تصوير المقطع كله.. ( يمكن اضطر احط من أهدافي السنة دي تحديث معدات المونتاج المتهالكة اللي اصبحت مشاكلها كتير 😅 )
لو خلصت الفيديو بدري ان شاء الله مش حاستنى للأحد المقبل وحانزله على طول وسط الأسبوع...
واعتذر بشدة عن التأخير 🙏🏻
في الوقت الحالي، للي ما شافش الجزء الاول، حتلاقوه هنا: https://www.youtube.com/watch?v=YLDnX...
ويا ريت تقولولي انتم أهدافكم السنة دي ايه؟ وناويين تنفذوها إزاي؟
خلونا ندردش شوية 😉
انجي 🌹
65 - 44
صباح الخير...
أخيرا رابط تحميل أجندة 2023...
drive.google.com/drive/folders/1uo7Q0ibxVaRZ7D1fJJ…
المجلد فيه الكتيبات مترتبة حسب توقيت الاستخدام:
رقم -1- الورقة اللي عملتها السنة اللي فاتت اللي باستخدمها آخر كل سنة علشان اقفل بيها السنة بتاعتي وأبدأ على نظافة.
طريقة استخدامها هنا: https://www.youtube.com/watch?v=YJz1-...
رقم -2- الأجندة السنوية.. اللي باخطط فيها لسنة كاملة، وباحدد أهدافي ببساطة واقسمها على السنة.. يعني خريطة للسنة كلها.
إزاي باخطط لسنة كاملة هنا: https://www.youtube.com/watch?v=7U_S8...
بعد كده اختار ما بين رقم -3- أجندة ربع سنوية أفقية (3 شهور مع بعض) أو رقم -4- أجندة شهرية رأسية (شهر واحد).. الفرق بينهم المساحة اكتر، لو الشهر زحمة، الاجندة الشهرية ممكن تكون انسب.. وطبعا الفرق الأهم هو التفضيل الشخصي.
إزاي باستخدمها هنا: https://www.youtube.com/watch?v=Q0i-y...
رقم -5- ورقم -6- كتيبات فاضية للملاحظات، شيئ لا استغنى عنه في أجندتي.. الفرق بينهم واحدة منقطة وواحدة مربعات.. برضه تفضيل شخصي.
طبعا إضافة إلى ملف اللي فيه ملصقات أسماء الشهور علشان لو تحبوا تستخدموا نفس الخط المستخدم في الأجندات.
طريقة طباعة وقص الورق هنا:
https://www.youtube.com/watch?v=puoGh...
**فيديوهات تانية لو حد يحب يشتري أجندة جاهزة أو يصنع أجندته الخاصة:**
اللي يحب يجيب أجندة جاهزة ومحتار يختار بينهم إزاي، الفيديو ده ممكن يساعد:
https://www.youtube.com/watch?v=pwAhj...
واللي يحب يصنع أجندته بنفسه بأقل التكاليف، هيلاقي الفيديو ده:
https://www.youtube.com/watch?v=jub4d...
ولو طالب ويحب حاجة للدراسة يبقى ييجي هنا:
https://www.youtube.com/watch?v=Tt1-e...
ده طبعا غير مخزون ضخم من الفيديوهات عن تخطيط الأهداف ومراجعتها على القناة.. ولو حد عنده أي سؤال انا في الخدمة دايما أكيد..
وافتكروا دايما، الأجندة هي أداة، اختيارها حسب الاحتياجات علشان تساعدني ارتب عقلي..
لكن الاجندة مش بتشتغل لوحدها، أنا اللي باقرر وانا اللي بانفذ..
كل سنة وأنتم طيبين ربنا يجعلها سنة سعيدة علينا جميعا إن شاء الله ❤️
انجي 🌷
289 - 115
صباح الخير..
أنا باحب الفترة دي جدا من السنة، الجو بيكون اجمل واحساس ان السنة الجديدة قربت بكل ما تحمله من معاني البدايات الجديدة ❤️
طبعا دي الفترة اللي باجهز فيها أجندة السنة الجديدة، وهي الأجندة السنوية اللي بتلم السنة كلها بكل تفاصيلها، والاجندة الشهرية والنوتة الفارغة. كالعادة باصممها حجم TN، فهل حد محتاج حجم مختلف؟
لو محتاجن منها حجم مختلف سيبولي تعليق وححاول انفذه إن شاء الله..
كمان أحب اشكركم من كل قلبي على كل الدعم اللي شفته منكم تعليقا على آخر فيديو قصير.. حقيقي وحشتوني قوي وفعلا تعليقاتكم فرقت وما تخيلتش كل الدعم ده، ولحد دلوقتي مش لاقية كلام مناسب يوصف اللي حسيته ❤️
أشوفكم على خير قريب إن شاء الله،
كل سنة وأنتم طيبين
انجي 🌹
578 - 203
أصدقائي الأعزاء،، أنا عارفة اني اتأخرت عليكم كتير في النشر، ووعدتكم بفيديو اشرح فيه بالضبط ايه اللي حصل الفترة اللي فاتت، لكن الفيديو ده كمان اتأخر شويتين لانه كان تقيل علي شوية..
ثم حصل اني صورت الفيديو فعلا لكن مالحقتش اخلص مونتاجه، للأسف اصبت بفيروس كورونا ومع أعراضها المرهقة كل شيئ توقف.. لكن حقيقي انا مهتمة جدا اني اعمل الفيديو ده بالذات وانشره لاني فعلا مدينة لكم به.. ان شاء الله لما تشوفوه حتفهموا قصدي..
شكرا من قلبي لكل حد دخل سأل علي، وكل حد دخل القناة يشوف لو فيه فيديو جديد حتى لو ما بعتش، شكرا لك حد مهتم لكل أصدقائي الأعزاء... ألف شكر...
لنا لقاء قريب بإذن الله.
انجي ⚘
527 - 270
صباح الخير،
اسمي انجي، وانا واحدة تعبت كتير من التوهان واللخبطة والدوشة اللي عايشين فيها في حياتنا اليومية، ولقيت سلامي الروحي وسط الورق والألوان والأجندات.. على الورق بانظم أفكاري، وبارتب نفسي، وبتبقى الحياة أسهل كتير.
على مدار السنين اللي فاتت اتعلمت كتير عن تنظيم حياتي وتنظيم وقتي وبيتي وترتيب أولوياتي، وحبيت أشارككم اللي اتعلمته، وانتو كمان تشاركوني اللي اتعلمتوه.
ايه الانسب في تنظيم الوقت: الورق ولا الديجيتال؟ إزاي اشتغل بفعالية أكتر وما أضيعش وقت؟ إزاي اتحكم في مصاريفي؟ إزاي أركز بالساعات وانا أصلا مش باعرف اركز ربع ساعة؟ إزاي بقلم وورقة اعمل اجندة كاملة بدون تكلفة؟ طب والحياة؟ أحسن حياتي إزاي؟ أتعود إزاي على عادات صحية فشلنا كتير في تطبيقها؟ أشرب ميه كتير؟ او ألعب رياضة كتير؟ او أقرأ كل يوم؟ إزاي اخلص من الكراكيب الكتيرة المادية والمعنوية؟ إزاي انظم مساحات صغيرة بطريقة منطقية؟
أسئلة زي دي وغيرها تعبتني سنين، لحد ما لقيت حلول لها وبعضها لسه بحاول أحله..
ايه رأيكم؟ تيجوا نفيد بعض ونتناقش؟