Tigrai Tv | Poke

Tigrai Tv
Posted 2 days ago

"ሕጋውን ትኽክለኛን መበል 14 ውድባዊ ጉባኤ ንምክያድ ምድላዋት ንገብር ኣለና" ብኣይተ ጌታቸው ረዳ ዝምራሕ ህወሓት።
መቐለ፥ 21 መስከረም 2017 ዓ/ም (ቴሌቪዥን ትግራይ)
ብምኽትል ኣቦ ወንበር ውድብ ህወሓት ኣይተ ጌታቸው ረዳ ዝምራሕ መድረኽ ኣባላት ማእኸላይ ኮሚቴን ላዕለዎት ኣመራርሓን ህወሓት ሎሚ እውን ቀፂሉ ከምዝውዓለ ተገሊፁ።
ኣብቲ " ህዝብን ውድብን ብምድሓን ህልውና ትግራይ ምርግጋፅ" ብዝብል ይካየድ ኣብ ዘሎ መድረኽ ዝቐረበ ሰነድ ምይይጥ ይካየደሉ ምህላዉ ተፈሊጡ።
እቲ ብኣይተ ጌታቸው ረዳ ዝምራሕ ህወሓት "ሕጋውን ትኽክለኛን" ዝበሎ መበል 14 ውድባዊ ጉባኤ ንምክያድ ምድላዋት ይግበር ምህላዉ ኣብቲ መድረኽ ተሓቢሩ።
ኣብቲ መድረኽ ሓሳቦም ዝሃቡ ተሳተፍቲ " ውድብ ህወሓት ናብዚ ሕዚ በፂሕዋ ዘሎ ምግምማዕ ክበፅሕ ዝኸኣለ ኣብቲ ውድብ ስር ዝሰደደ ፀረ_ዲሞክራሲያውነትን ተሓታታይነት ዘይምህላውን እዩ" ኢሎም።
" ስለዝኾነ ሕዚ ዝተዳለወ ሰነድ ህዝብን ውድብን ንምድሓን ካብቲ ዝመፃናዮ ጉግይ መንገዲ ንምውፃእ ሕማም ውድብ እንታይ እዩ ? ብኸመይ ሓሚማን መን አሕሚምዎን ? ዝምልስ እዩ" ክብሉ ተዛሪቦም።
እቲ ሰነድ ብምሁራን ሓሳባት ክውስኹሉ ብምግባር ንኩሉ ብግልፂ ዕላዊ ከምዝኸውንን ብኣባላትን ህዝብን ምይይጥ ከምዝግበረሉን ተገሊፁ።
እቲ ክካየድ እዩ ዝተበሃለ መበል 14 ጉባኤ መዓዝን ብኸመይን ከምዝካየድ ግና ግልፂ ኣይተገበረን።
ውድብን መንግስትን ክፈላለ ኣብ ምግባር ምስቲ ብደብረፅዮን ገ/ሚካኤል (ዶ.ር) ዝምራሕ ህወሓት ሓደ መፈላለይ ጉዳይ ከምዝነበረ ኣብቲ መድረኽ ተላዒሉ።
"ሕዚ ኣብ ዝሓለፉ ፀገማት ጥራሕ ትኹረት ምግባር ዘይኮነስ ህዝቢ ትግራይ እንታይ እዩ ዝደሊ ኣብ ዝብል ዓሲልና ክንሰርሕ ይግባእ ፤ ነዙይ ድማ ኩልና ናይ ተግባር ሰባት ክንከውን ይግባእ" ተባሂሉ።
"ግልጋሎት ዋሃብቲ ትካላት ዝህበኦ ግልጋሎት ምዑርይ ንምግባር ዳግም ክጣያሻ ኣብ ምግባርን ውዕሊ ፕሪቶሪያ ኣብ ምትግባርን ምስቲ ብዶ/ር ደብረፅዮን ዝምራሕ ህውሓት ሰፊሕ ኣፈላላይ ነይሩ እዩ" ዝብል ሓሳብ እውን ቀሪቡ እዩ።
ኣብዚ ኣኼባ ዝሳተፉ ዘለዉ ንምክትል ኣቦመንበር ህወሓት ኣይተ ጌታቸው ረዳ ሓዊሱ 16 ኣባላት ማእኸላይ ኮሚቴ ህወሓት እቲ ብደብረፅዮን ገ/ሚካኤል (ዶ.ር) ዝምራሕ ህወሓት ዘካየዶ ጉባኤ " ሕጋዊ ኣይኮነን" ብምባል ኣይንሳተፍን ምባሎም ይዝከር።
ብ ኣቦወንበር ደብረፅዮን ገ/ሚካኤል (ዶ.ር) ዝምራሕ ህወሓት ድማ ንምክትል ኣቦመንበር እቲ ውድብ ሓዊሱ ኣብቲ ጉባኤ ዘይተሳተፉ 16 ኣባላት ማእኸላይ ኮሚቴ ካብቲ ውድብ ከምዘባረሮምን: እቶም ኣባላት ማእኸላይ ኮሚቴ ንህወሓት ወኪሎም ዝኾነ ይኹን ምንቅስቓስ ክገብሩ ኣይኽእሉን ምባሉን ዝዝከር እዩ።
ቦርድ መረፃ ኣትዮጵያ ብደብረፅዮን ገ/ሚካኤል(ዶ/ር) ዝምራሕ ህውሓት ዘካየዶ ጉባኤ ኮነ ዘሕልፎ ውሳነታት ተቐባልነት ከምዘይብሉ ምፍላጡ እውን ይዝከር።
#ይብራህ_እምባየ

111 - 11

Tigrai Tv
Posted 2 days ago

ህዝብን ውድብን ንምድሓን ብዝተወደበ ፖለቲካዊ መንገዲ ከምዝሰርሑ ምኽትል ኣቦ ወንበር ውድብ ህወሓት ኣይተ ጌታቸው ረዳ ገሊፆም።
መቐለ፥ 21 መስከረም 2017 ዓ/ም (ቴሌቪዥን ትግራይ)
ኣይተ ጌታቸው ነዚ ዝበሉ ኣብ መድረኽ ኣባላት ማእኸላይ ኮሚቴ ህወሓትን ላዕለዎት ኣመራርሓን እዩ።
"ህዝብን ውድብን ኣብ ምድሓን ኩሉ ዓቅምታት ተጠቒምና ብዝተወደበ ፖለቲካዊን ሕጋውን መንገዲ ክንሰርሕ ኢና" ኢሎም።
"በዓል 50 ዓመት ዕድመን ታሪኽን ህወሓት ሕጋዊ ሰውነት ንምምላስ ጥራሕ ዘይኮነስ ግቡእ ቦትኡ ዝረኽበሉ ዕድል ንምፍጣር ክስራሕ እዩ" ኢሎም።
ኩሎም ዓቅምታት ኣብ ብሄራዊ ረብሓ ትግራይ ክዓስሉ ክንገብር ኣለና ዝበሉ ኣይተ ጌታቸው ህወሓት በይኑ ኣብ ናይ ትግራይ ዕድል ብሞኖፖል ዝቆፃፀረሉ መንገዲ ክህሉ ከምዘይብሉ ተዛሪቦም።
"መሪሕነት ህወሓት ብዝፈፀሞም ገበናት ህዝቢ ኣብ ሽግር ወዲቁ እዩ" ዝበሉ ኣይተ ጌታቸው "ምድሓን ህወሓት ኣገዳሲ ስለዝኾነ እዙይ ንምግባር ብትኹረት ክስራሕ እዩ" ኢሎም።
"ጠቕላሊ ዝኾነ ሓይሊ ሒዝካ ህወሓት ክድሕን ኣይኽእልን፤ ህዝቢ ዝሰምዕን ዲሞክራሲያዊን ህወሓት እዩ ክድሕን ዘለዎ" ኢሎም።
"ምስቲ ጉባኤ ኣካይደ ዝብል ሓይሊ ዘሎ ሓደ ዘይምቅዳው ስልጣን ማእኸል ዝገበረ እዩ ፤ ሓለፍቲ ናይ ምምዳብ ሓላፍነት ናይ ፕረዚደንት ኮይኑ እንተሎ ምደባ ዝካየድ ዝነበረ ብቤት ፅሕፈት ህወሓት እዩ" ኢሎም።
ኣብዚ ኣኼባ ዝሳተፉ ዘለዉ ንምክትል ኣቦመንበር ህወሓት ኣይተ ጌታቸው ረዳ ሓዊሱ 16 ኣባላት ማእኸላይ ኮሚቴ ህወሓት እቲ ብደብረፅዮን ገ/ሚካኤል (ዶ.ር) ዝምራሕ ህወሓት ዘካየዶ ጉባኤ " ሕጋዊ ኣይኮነን" ብምባል ኣይንሳተፍን ምባሎም ይዝከር።
ብ ኣቦ ወንበር ደብረፅዮን ገ/ሚካኤል (ዶ.ር) ዝምራሕ ህወሓት ድማ ንምክትል ኣቦመንበር እቲ ውድብ ሓዊሱ ኣብቲ ጉባኤ ዘይተሳተፉ 16 ኣባላት ማእኸላይ ኮሚቴ ካብቲ ውድብ ከምዘባረሮምን: እቶም ኣባላት ማእኸላይ ኮሚቴ ንህወሓት ወኪሎም ዝኾነ ይኹን ምንቅስቓስ ክገብሩ ኣይኽእሉን ምባሉን ዝዝከር እዩ።
እቲ መድረኽ ፅባሕ እውን ቀፂሉ ክውዕል እዩ ተባሂሉ።
#ይብራህ_እምባየ

215 - 23

Tigrai Tv
Posted 3 days ago

" ጊዜያዊ ምምሕዳር ትግራይ መሬት ሸይጡ ዝብል ዝምቡዕ ሓበሬታ ኮነ ተባሂሉ ህዝቢ ንምድንጋር ዝተቓልሐ ኣጀንዳ እዩ" : - ዋና ኣመሓዳሪ ዞባ ማእኸል ትግራይ ኣይተ ሰሎሞን መዓሾ
መቐለ፥ 20 መስከረም 2017 ዓ.ም (ቴሌቪዥን ትግራይ)
"ጉባኤ ንኽግበር ሕጋዊ መትከላት መሰረት ገይርካ ምክያድ ግድን እዩ" ዝበሉ ዋና ኣመሓዳሪ ዞባ ማእኸል ትግራይን ኣባል ማእኸላይ ኮሚቴ ህወሓትን ኣይተ ሰሎሞን መዓሾ፣ "እቲ ዝተኻየደ ጉባኤ ሕጋዊ መትከላት ውድብ ህወሓት ዝጠሓሰን ኣመራርሓ ካብ ምውራድን ምድያብን ወፃኢ መቃለሲ ሓሳብ ዘይነበሮን እዩ" ክብሉ ገሊፆም።
ኣይተ ሰለሙን ነዚ ዝበሉ ኣብ ህልው ዅነታት ኣድሂቦም ንሚዲያታት መግለፂ ኣብ ዝሃቡሉ ጊዜ እዩ።
"እቲ ዝተኻየደ ዘይሕጋዊ ጉባኤ ብሕጋዊ መትከል ውድብ ክግምገም ኣለዎ። ኮሚሽን ቁፅፅር ዘይኣመነሉ ጉባኤ ክካየድ ኣይነበሮን። ኣሰናዳዊት ኮሚቴ እቲ ከይዲ ትኽክል ኣይኮነን ኢሉ ንባዕሉ ኣግሊሉ እዩ። ብርክት ዝበላ ከባቢታት ኣይንሳተፍን ስለ ዝበላ ክፀንሕ ደሊና ነይርና።" ዝበሉ እቶም ዋና ኣመሓዳሪ "መሰረታዊ ኣፈላላይና ምጥሓስ ሕጋዊ መትከላት እቲ ውድብ እዩ ነይሩ።" ክብሉ ሓሳቦም ኣብሪሆም።
"ብደብረፅዮን ገ/ሚካኤል (ዶ.ር ) ዝምራሕ ህወሓት ኣብ ዝተፈላለዩ ከባብታት ዘካየዶ ኣኼባ ካብ ፀለመ ወፃኢ ንትግራይ ዝጠቅም ኣጀንዳ የብሉን። ጊዜያዊ ምምሕዳር ትግራይ መሬት ሸይጡ ዝብል ዝንቡዕ ሓበሬታ ኮነ ተባሂሉ ህዝቢ ንምድንጋር ዝተቓልሐ ኣጀንዳ እዩ።" ድማ ኢሎም።
"ውዕል ፕሪቶሪያ ዓቢይ መቃለሲና እዩ" ዝበሉ ኣይተ ሰሎሞን "ውሑስ ፀጥታ ክህልወና፣ ተመዛበልቲ ክምለሱ፣ ህልውናና ክረጋገፅን ዴሞክራሲ ክዕንብብን መንግስቲ ክጠናኸር ኣለዎ። መንግስቲ ክጠናኸር እንተኾይኑ ናተይ ዝብሎ መሓውር ክህልዎ ኣለዎ። መንግስቲ መደባቱ ሒዙ ናብ ህዝቢ ክወርድ ኣለዎ።" ክብሉ ሓሳቦም ገሊፆም።
ንምክትል ኣቦመንበር ህወሓት ኣይተ ጌታቸው ረዳ ሓዊሱ 16 ኣባላት ማእኸላይ ኮሚቴ ፤ በቲ ሓደ ወገን ዝተኻየደ ጉባኤ ሕጋዊ ኣይኮነን ብምባል ኣብቲ ጉባኤ ኣይንሳተፍን ምባሎም ይዝከር።
#ቶማስ_ሓዱሽ

153 - 14

Tigrai Tv
Posted 3 days ago

ሕጋዊ ሰውነት ህወሓት ብፖለቲካዊ ልዝብ ፓነል ሕብረት ኣፍሪካ ንምምላስ ይስራሕ ኣሎ:- ብጌታቸው ረዳ ዝምራሕ ህወሓት
መቐለ፥ 20 መስከረም 2017 ዓ/ም (ቴሌቪዥን ትግራይ)
ሕጋዊ ሰውነት ህወሓት ይኹን ዘይተመለሱ ጉዳያት ውዕሊ ፕሪቶሪያ ኣብ ወርሒ ሕዳር 2017 ዓ/ም ኣብ ዝካየድ ፖለቲካዊ ልዝብ ፓነል ሕብረት ኣፍሪካ ንምምላስ ይስራሕ ከምዘሎ ኣባል ማእኸላይ ኮሚቴ ህወሓት ኣይተ ረዳኢ ሓለፎም ገሊፆም።
ኣይተ ረዳኢ ነዙይ ዝበሉ ሎሚ ብምኽትል ኣቦ ወንበር ውድብ ህወሓት ኣይተ ጌታቸው ረዳ እናተመረሐ ዝተኻየደ መድረኽ ዘተ ኣባላት ማእኸላይ ኮሚቴ ህወሓትን ላዕለዎት ኣመራርሓን ኣመልኪቶም ንጋዜጠኛታት መብርሂ ኣብ ዝሃብሉ እዩ።
ኣብቲ ዝነበረ ዋዕላ ማእኸላይ ኮሚቴ ህወሓት ንምንታይ ተገማሚዑ፣ ምርግጋፅን ምውሓስን ብሄራዊ ህላወ ትግራይ ብኸመይ ይምራሕ ዝብሉ ዋና ኣጀንዳታት እቲ መድረኽ ምንባሮም ገሊፆም።
ኣመራርሓ ህወሓት ቅድሚ ኣብ ክልተ ምግምዑ ዝነበረ ኣፈላላይ መኸተ ይገምገም ዶ ኣይገምገም ዝብልን እቲ ጉባኤ ብኸመይ ይካየድ ኣብ ዝብልን ከምዝነበረ ተዛሪቦም።
"ብደብረፅዮን ገብረሚካኤል (ዶ.ር) ዝምራሕ ህወሓት ታሪኽ 50 ዓመት ህወሓትን መኸተ ህዝቢ ትግራይን ሓንሺሹ ገበነኛ እየ ኢሉ ብምእማን ከም ብሓዱሽ ኣብ ቦርድ መረፃ ኢትዮጵያ ምምዝገቡ ኣብቲ ዋዕላ ብስፍሓት ተላዒሉ እዩ" ኢሎም።
" እቲ ብኣይተ ጌታቸው ረዳ ህወሓት ዝምራሕ ብወገኑ እቲ ምምላስ ሕጋውነት መኸተ ብዘራኽስ ዘይኾነስ ብውዕሊ ፕሪቶሪያን ብፖለቲካዊ ልዝብን ክምለስ ኩሉ ዓቅሙ ኣዋዲዱ ይሰርሕ ኣሎ" ክብሉ ተዛሪቦም።
ነዙይ ድማ ኩሉ ኣብ ውሽጢ ይኹን ኣብ ደገ ዘሎ ትግራዋይ ሓጋዛይ ክኸውን ፆዊዒት ኣቅሪቦም።
"ኣብቲ ብዶክተር ደብረፅዮን ዝምራሕ ጉባኤ ብፍላጥ ይኹን ብዘይፍላጥ ዝተሳተፈ ዝኾነ ይኹን ሰብ ሕዚ እውን ዝናሳሕ እንተኾይኑ በርና ክፍቲ እዩ" ኢሎም ኣይተ ረዳኢ።
"ሓይሊ ፀጥታ ትግራይ ናይ ህዝቢ ትግራይ ረብሓ ዝሕሉ እምበር ናይ ዝኾነ ጉጅለ መጋበርያ ኣይኮነን፤ መስዋእቲ ህዝቢ ትግራይ ዘራኽስ ዝኾነ ይኹን ምንቅስቃስ ብትሪ እዮም ዝኹንንዎን ዝቃለስዎን" ኢሎም ።
ንምክትል ኣቦመንበር ህወሓት ኣይተ ጌታቸው ረዳ ሓዊሱ ኣብቲ መድረኽ ዝሳተፉ ዘለዉ ኣባላት ማእኸላይ ኮሚቴ ፤ በቲ ሓደ ወገን ዝተኻየደ ጉባኤ ዘይሕጋዊ እዩ ብምባል ኣብቲ ጉባኤ ኣይንሳተፍን ምባሎም ይዝከር።
#ይብራህ_እምባየ

147 - 12

Tigrai Tv
Posted 3 days ago

"ኣብ መንጎ ኣመራርሓ ውድብ ህወሓት ዘሎ ኣፈላላይ ብሰላማዊ መንገዲ ኣሊኻ ድልየትን ባህግን ህዝቢ ትግራይ ንምርግጋፅ ክንሰርሕ ኢና " ኢሎም ኣባላት ማእኸላይ ኮሚቴ ህወሓትን ላዕለዎት ኣመራርሓን
መቐለ፥ 20 መስከረም 2017 ዓ/ም (ቴሌቪዥን ትግራይ)
"ኣብ መንጎ ኣመራርሓ ውድብ ህወሓት ዘሎ ኣፈላላይ ክሰፍሕ ዝገብር ዘሎ ኣንፃር ውዕሊ ፕሪቶሪያን ኣንፃር ሰላምን ዝኾነ ሓይሊ እዩ ኢሎም" ኣባላት ማእኸላይ ኮሚቴ ህወሓትን ላዕለዎት ኣመራርሓን ።
ብምኽትል ኣቦ ወንበር ውድብ ህወሓት ኣይተ ጌታቸው ረዳ ዝምራሕ መድረኽ ኣባላት ማእኸላይ ኮሚቴ ህወሓትን ላዕለዎት ኣመራርሓን "ውድብ ኣብ መድሓንን ህልውና ትግራይ ኣብ ምርግጋፅን" መሰረት ገይሩ ኣብ ምዝታይ ይርከብ።
ኣብቲ መድረኽ ዝሳተፉ ዘለዉ ኣባላት ማእኸላይ ኮሚቴ ህወሓትን ላዕለዎት ኣመራርሓን " ሕጋዊ ሰውነት ውድብ ህወሓት ከይምለስ ይኹን እቲ ሕዚ ዘሎ ኣንፃራዊ ሰላም ከይቕፅል ዕንቅፋት ዝኾውን ዘሎ እቲ ብደብረፅዮን ገ/ሚካኤል (ዶ.ር) ዝምራሕ ሓይሊ እዩ" ኢሎም።
"ብደብረፅዮን ገ/ሚካኤል (ዶ.ር) ዝምራሕ ሓይሊ ጉባኤ ኣካይደ ብዝብል ጉልባብ ንዓርሱ ከም ሕጋዊ ቆፂሩ ታሕተዎት ኣብያተ ምኽሪ ክልል ትግራይ እናኣከበ ይርከብ " ኢሎም።
"እቲ ሓይሊ ዘካይዶ ዘሎ ፀለመን ጠቐነን ካብ ዕላማታትን ክብርታትን ህዝቢ ትግራይን ውድብ ህወሓትን ዝወፀ ከምዝኾነን እዙይ ስርዓት ክሕዝ ከምዘለዎን ምግላፆም" ተሓቢሩ።
" እዙይ ኩሉ ዝግበር ዘሎ ድማ ኣብ ስልጣን ንምቅፃልን ተሓታቲ ንዘይምዃንን እዩ" ኢሎም ።
"ስለዝኾነ እዙይ ብሰላማዊን ሕጋውን መንገዲ ኣሊኻ ድልየትን ባህግን ህዝቢ ትግራይ ክነረጋግፅ ኣለና" ኢሎም።
" እቲ ሕዚ ዘሎ ኣንፃራዊ ሰላም ንክቅፅል፣ ህዝብን ውድብን ክድሕንን ውዕሊ ፕሪቶሪያ ብሙሉእነት ክትግበርን ግደ መሪሒነት ዕዙዝ ብምዃኑ ለይትን ቀትርን ክንሰርሕ ኢና" ኢሎም እቶም ኣባላት ማእኸላይ ኮሚቴ ህወሓትን ላዕለዎት ኣመራርሓን።
እቲ መድረኽ ኣብ ናይ ሎምዓንቲ ዋዕልኡ ኣብ ምድሓን ውድብን መፃኢ ኣንፈት ትግራይን ትኹረት ገይሩ ኣብ ዝቐረበ ሰነድ ይዝቲ ከምዘሎ ተሓቢሩ።
"ኣብ ናይ ፅባሕ ፕሮግራም ድማ መንግስታዊ ዕማማት መሰረት ዝገበረ ዘተ ክቕፅሉ እዮም ተባሂሉ ትፅቢት ይግበር" ተባሂሉ።
ኣብቲ መድረኽ ዝሳተፉ ዘለዉ ኣባላት ማእኸላይ ኮሚቴ በቲ ሓደ ወገን ዝተኻየደ ጉባኤ ዘይሕጋዊ እዩ ብምባል ኣብቲ ጉባኤ ኣይንሳተፍን ምባሎም ይዝከር።
#ይብራህ_እምባየ

84 - 9

Tigrai Tv
Posted 4 days ago

ዓርሶም ካብ መበል 14 ውድባዊ ጉባኤ ዘግለሉ ኣመራርሓ ህወሓት " ውድብ ንምድሓን ዝዓለመ መድረኽ ነሳልጥ ኣለና" ኢሎም።
መቐለ፥ 20 መስከረም 2017 ዓ.ም (ቴሌቭዥን ትግራይ)
ንምክትል ኣቦ መንበር ህወሓት ጌታቸው ረዳ ሓዊሱ ዓርሶም ካብ መበል 14 ውድባዊ ጉባኤ ዘግለሉ ኣባላት ማእኸላይ ኮሚቴን ኣመራርሓን ህ.ወ.ሓ.ት ኣብ ህልዊ ኩነታት ዘድሀበ መድረኽ ዘተ የሳልጡ ኣለዉ።
እቲ መድረኽ ውድብ ህውሓት ኣብ ምድሓንን ህልውና ትግራይ ኣብ ምርግጋፅን መሰረት ዝገበረ እዩ ተባሂሉ።
ኣብቲ መድረኽ ዘተ ተወከልቲ ዞባታት እውን ተረኺቦም እዮም።
"ጉባኤ ኣካይደ እየ ዝብል ሓይሊ ንኣባላቱ ኣብ ዝተፈላለዩ ከባብታት ብምእካብ ትግራይ ናይ ምብታን ስራሕ ይሰርሕ ኣሎ ፤ እዙይ ትግራይ ምስቲ ሕዚ ዘለቶ ተኣናፊ ኩነታት ሓደግኡ ከቢድ ብሞዃኑ ኣብ ዝሓፀረ ግዜ መፍትሒ ክረክብ ኣለዎ" ተባሂሉ።
እቲ ፀገም ንምፍታሕ ካብ ላዕሊ ክሳብ ታሕቲ ዝተዋደዱ ስራሕቲ ከምዝስርሑ ተሓቢሩ።
ኣብ መንጎ ኣመራርሓ ውድብ ህወሓት ዘጋጠመ ምግምማዕ አጀንዳ ብምግባር ድማ እቲ ዘተ ይካየድ ኣሎ።
ቅድም ክብል መበል 14 ጉባኤ ዘካየደ ኣመራርሓ ህውሓት 6 መስከረም 2017 ዓ.ም ኣብ ዘውፀኦ መግለፂ ንምክትል ኣቦመንበር እቲ ውድብ ጌታቸው ረዳ ሓዊሱ ዓርሶም ካብቲ ጉባኤ ንዘግለሉ 16 ኣባላት ማእኸላይ ኮሚቴ ካብቲ ውድብ ኣባሪርና ኣለና ብምባል ነቲ ውድብ ወኪሎም ዝኾነ ይኹን ምንቅስቓስ ክገብሩ ኣይኽእሉን ምባሉ ይዝከር።
#ይብራህ_እምባየ

277 - 31

Tigrai Tv
Posted 1 week ago

ኣብዚ እዋን ኣብ ትግራይ ንዘሎ ፀገም ኣብ ውሽጢ ህውሓት ከምዘሎ ኣምሲልካ ንምርኣይ ዝግበር ፃዕሪ ፍፁም ተቐባልነት የብሉን:- ጉባኤ ዘካየደ ኣመራርሓ ህወሓት
መቐለ፥14 መስከረም 2016 ዓ.ም (ቴሌቭዥን ትግራይ)
ጉባኤ ዘካየደ ኣመራርሓ ህወሓት ካቢኔ ግዝያዊ ምምሕዳር ትግራይ 12 መስከረም 2017 ዓ.ም ንዘውፀኦ መግለፂ ኣመልኪቱ ምላሽ ሂቡ።
ኣብዚ እዋን ኣብ ትግራይ ንዘሎ ፀገም ኣብ ውሽጢ ህውሓት ከምዘሎ ኣምሲልካ ንምርኣይ ዝግበር ፃዕሪ ፍፁም ተቐባልነት የብሉን ኢሉ። ህወሓት ንዝገጠሞ ውሽጣዊ ፀገም ንምፍታሕ ዓሊሙ ጉባኤ ከምዘካየደን መፍትሒ ኣንፈት ከምዝነፀረን ኣብቲ መግለፂ ኣብሪሁ።
"እቲ ኣብ ጉባኤ ዘይተሳተፈ ሓይሊ መንግስታዊ ስልጣን ሒዙ ህውሓት ንከፍርስ ተዋዲዱ ይሰርሕ ኣሎ" ክብል ከሲሱ።
" ግዝያዊ ምምሕዳር ንውፅኢታት ስምምዕ ፕሪቶርያ ክፍፅምን ምምሕዳራዊ ኣገልግሎታት ክህብን እምበር ንባዕሉ ናብ ስሩዕ ሃገራዊ መንግስቲ ለዊጡ ሰራዊት ክእዝዝ ኣይኽእልን " ኢሉ።
" ሰራዊት ትግራይ ኣብ ውሽጢ እቲ ግዝያዊ ምምሕዳር ናይ ባዕሉ ተሳትፎን ብፅሒትን ዘለዎ እምበር ብግዝያዊ ምምሕዳር ዝጥርነፍ ፈፃሚ ኣካል ኣይኮነን ክብል ኣመላኺቱ።
ሰራዊት ትግራይ ብመስርሕ ምፍታሕ ዕጥቂን ዳግመ ምፅንባርን ውዕሊ ፕሪቶርያ ናብ ስድርኡ ክምለስ ዝፅበ ዘሎ ሓይሊ እምበር ከም ፖሊስን ሚሊሻን ኣብ ትሕቲ ግዝያዊ ምምሕዳር ተጠርኒፉ መደባት ዘፍፅም ኣይኮነን ዝበለ እቲ መግለፂ እዚ ኣካይዳ ድማ ሰራዊት ኣብ ግዝያዊ ምምሕዳር ተቐርቂሩ ንክብተን ዝገብር ሽርሒ እዩ ክብል ገሊፅዎ።
ግዝያዊ ምምሕዳር ንፁርን ውስንን ተልእኾ ሒዙ ከም መሰጋገሪ ዘገልግል እምበር ዝተማልአ መንግስታዊ ሓላፍነት የብሉን ዝበለ እቲ መግለፂ ካብቲ ዝተቐመጠሉ ግዘ ገደብ ክፀንሕን ንባዕሉ ናብ ዝተማልአ መንግስታዊ ሓላፍነት ክልውጥን ዝግበር ምንቅስቓስ ፀረ ዲሞክራስን ዘይሕገመንግስታዊን ኣካይዳ እዩ ክብል ገሊፁ።
"ግዝያዊ ምምሕዳር ዝተውሃቦ ተልእኾ ገዲፉ ኣብ ዘይምልከቶ እናኣተወ ህውሓት ንምፍራስን ሰራዊት ትግራይ ንምእዛዝን ዝገብሮ ምንቅስቓስ ጠጠው ከብል ይግባእ ኢሉ" እቲ ጉባኤ ብዘካየደ ኣመራርሓ ህውሓት ዝወፀ መግለፂ።
ኣብ ግዝያዊ ምምሕዳር ዝረአዩ ፀገማት ንምምዕርራይ ናብ ተግባራዊ ምንቅስቓስ ከምዝኣቱ ዝሓበረ መግለፂ ናይቲ ጉባኤ ዘካየደ ኣመራርሓ ህውሓት፤ እቲ ተግባራዊ ምንቅስቓስ ግን መዓዝን ብኸመይን ከምዝጅምሮ ግልፂ ኣይገበረን።
ካቢኔ ግዝያዊ ምምሕዳር ትግራይ12 መስከረም 2017 ዓ/ም ኣብ ዘውፀኦ መግለፂ ኣብ ትግራይ ተፈጢሩ ዘሎ ፀገም ኣብ መንጎ ህወሓትን ግዚያዊ ምምሕዳርን ዘይኾነስ ኣብ ዉሽጢ ውድብ ህወሓት ኣብ ላዕለዋይ መሪሕነቱ ዝተፈጠረ ምክፍፋል እዩ ኢሉ ምግላፁ ዝፍለጥ እዩ።
ካቢኔን ፕሬዚደንትን ግዝያዊ ምምሕዳር ብሕጊ ዝተደንገገን ብዕላዊ ኣግባብ ዝተቐመጠን መንግስታዊ ሓላፍነቶም ንምውፃእን ዝተማለአ መንግስታዊ ቁመና ንምውናን ኣብ ኩሎም ትካላትን መሓውራትን መንግስቲ ዘድሊ ናይ ሓላፍነት ምደባታትን ምትዕርራያትን፣ ናይ ህዝቢ መድረኻትን ናይ ለውጢ ስራሕቲን ሕግን ስርዓትን ብዝሓለወ ኣግባብ ምክያድ ከምዝቕፅል ምግላፁ ዝዝከር እዩ።
"ኣካላት ፀጥታ ብካቢኔን ፕሬዚደንትን ግዝያዊ ምምሕዳር እናተመርሑ ብሕግን ስርዓትን መሰረት ዝወሃቦም ተልእኾ ኣብ ምፍፃም ፤ ኣብ መንጎ ፖለቲካዊ ውድባት ኣብ ዝፍጠር ዝኾነ ይኹን ኣጀንዳ ዘይሻራዊ መትከልን ቅዋምን ተኸቲሎም ዝሰርሑ ምዃኖም ካቢኔ ግዝያዊ ምምሕዳር ትግራይ የረጋግፅ" ክብል ምግላፁ እውን ይዝከር።

340 - 22

Tigrai Tv
Posted 1 week ago

ውሳነታት ግዝያዊ ምምሕዳር ንምፍራስ ይኹን መሓውር መንግስቲ ንምህዋኽ ዝግበር ፈተነ ተቐባልነት የብሉን፦ካቢኔ ግዝያዊ ምምሕዳር ክልል ትግራይ
መቐለ፥ 12 መስከረም 2017 ዓ/ም (ቴሌቪዥን ትግራይ)
ካቢኔ ግዝያዊ ምምሕዳር ትግራይ 11 መስከረም 2017 ዓ/ም ኣብ ዘካየዶ ስሩዕ ኣኼባኡ ኣብ እዋናዊ ኩነታት ትግራይ ዝርዝር ምይይጥ ብምክያድ ሓበራዊ ቅዋም ኣውፂኡ ኣሎ።
ኣብቲ ዘውፀኦ ሓበራዊ ቅዋም መንግስታዊ መደባታት ንምልዓል፣ ሓደሽቲ ምድባት ንምክያድ ወይ ውሳነታት ግዝያዊ ምምሕዳር ንምፍራስ ይኹን መሓውር መንግስቲ ንምህዋኽ ዝግበር ፈተነ ተቐባልነት ከምዘይብሉ ካቢኔ ግዝያዊ ምምሕዳር ክልል ትግራይ ኣፍሊጡ።
ካቢኔን ፕሬዚደንትን ግዝያዊ ምምሕዳር ብሕጊ ዝተደንገገን ብዕላዊ ኣግባብ ዝተቐመጠን መንግስታዊ ሓላፍነቶም ንምውፃእን ዝተማለአ መንግስታዊ ቁመና ንምውናን ኣብ ኩሎም ትካላትን መሓውራትን መንግስቲ ዘድሊ ናይ ሓላፍነት ምደባታትን ምትዕርራያትን፣ ናይ ህዝቢ መድረኻትን ናይ ለውጢ ስራሕቲን ሕግን ስርዓትን ብዝሓለወ ኣግባብ ምክያድ ከምዝቕፅል ገሊፁ።
እዚ ከይዲ መንግስታዊ መደብን ዕማምን ምዃኑ ተፈሊጡ ኣብዚ መዳይ ዝህሉ ዝኾነ ይኹን ምትዕንቃፍ ብሕጊ መሰረት መልክዕ ንምትሓዝ ክስርሐሉ ምዃኑ እውን ኣፍሊጡ።
ኣብ ትግራይ ተፈጢሩ ዘሎ ፀገም ኣብ መንጎ ህወሓትን ግዚያዊ ምምሕዳርን ዘይኾነስ ኣብ ዉሽጢ ውድብ ህወሓት ኣብ ላዕለዋይ መሪሕነቱ ዝተፈጠረ ምክፍፋል እዩ ኢሉ።
እቲ ምክፍፋል ኣብ መሓውር መንግስቲ ዝፈጥሮ ዘሎ ኣሉታዊ ግደ ከምዘሎ ኮይኑ ንግዝያዊ ምምሕዳር ከም መንግስትን ንመንግስታዊ ስራሕቱን ግን ፈፂሙ ዘይምልከትን ዘየካትትን ምዃኑ ሓቢሩ።
ውዕሊ ፕሪቶርያ ብሙሉእነት ክፍፀም ኣብ ምግባር፣ ግዝኣታዊ ሓድነት ኣብ ምርግጋፅን ተመዛበልቲ ናብ ቦትኦም ንምምላስ ናይ ኩሉ ትግራዋይ ዓቕሚ ብምትእኽኻብ ዝተወደበን ዝተናበበን ስራሕ ከምዝስራሕ ኣብሪሁ።
ኣካላት ፀጥታ ትግራይ ኩሉ ዓይነት ፀገማትን ፈተናታትን ተፃዊሮም ፀጥታ ትግራይ ኣብ ምርግጋፅ ዝሰርሕዎ ዘለዉ ኣድማዒ ስራሕቲ ኒኢዱ።
ኣብ ልዕሊ ሓይልታት ፀጥታ ትግራይ ዝግበር ዝኾነ ይኹን ፀለመን ጠቐነን መንግስቲ ብሕጊ መሰረት ስርዓት እናትሓዞ ከም ዝኸይድ ካቢኔ ግዝያዊ ምምሕዳር ክልል ትግራይ ኣብ ዘውፀኦ ቅዋም መግለፂ ኣፍሊጡ።

507 - 76

Tigrai Tv
Posted 1 week ago

ሓድነት ህዝቢ ኣስጢምካ ዘላቂ ሰላም ንምርግጋፅ ከም ዝስራሕ ደብረፅዮን ገብረሚካኤል (ዶ.ር) ተዛሪቦም።
መቐለ፥11 መስከረም 2017 ዓ.ም (ቴሌቭዥን ትግራይ )ሓድነት ህዝቢ ኣስጢምካ ዘላቂ ሰላም ንምርግጋፅ ከም ዝስራሕ ኣቦ ወንበር ውድብ ህወሓት ደብረፅዮን ገብረሚካኤል (ዶ.ር) ተዛሪቦም።

ደብረፅዮን ገብረሚካኤል (ዶ.ር) ነዙይ ዝበሉ ኣብቲ ዝተኻየደ መበል 14 ውድባዊ ጉባኤ ዝተመረፁ ኣባላት ማእኸላይ ኮሚቴን ኣባላት ህወሓት ነበርቲ ከተማ መቐለን ዝተረኸብሉ መድረኽ ኣብ ሓወልቲ ሰማእታት ኣብ ዝተሳለጠሉ እዋን እዩ።
"ህዝቢ ትግራይ ብዝተወደበ መንገዲ ብምቅላሱ ከቢድ መስዋእቲ ከፊሉ ህላውኡ ኣውሒሱ እዩ" ኢሎም።
"ብከቢድ መስዋእቲ ዝተረከበ ውዕሊ ፕሪቶሪያ ዓቒብና ዘይተመለሱ ሕቶታት ንምምላስ ድማ ሰላም ቀዳማይ ሕርያና ገይርና ክንሰርሕ ኢና" ኢሎም።

ዘይተመለሱ ሕቶታት ንምምላስ ይኹን ዘለቂ ሰላም ንምርግጋፅ ድማ ሓድነት ህዝቢ ተጠናኺሩ ክቅፅል ከምዘለዎ ገሊፆም።
"ዝተጀመሩ ስራሕቲ ኣጠናኺርካ ንምቅፃል ምስ ህዝቢ እናተማኸርካ ክኽየድ ስለዝግባእ ምስ ህዝቢ እንዳተራኸብና ክንዝቲ ኢና" ኢሎም።
ዘሎ ፖለቲካዊ ኣፈላላይ ብሰላማዊ መንገዲ ንምፍታሕ እውን ፃዕሪ ከምዝግበር ተዛሪቦም።

ተሳተፍቲ እቲ መድረኽ እውን ዘሎ ኣፈላላይ ብዘተ ዝፍተሐሉን ህዝቢ ትግራይ እፎይ ዝብለሉን ኩነታት ክፍጠረሎም ሓቲቶም።
ኣብቲ መድረኽ ከንቲባ ከተማ መቐለ ኣይተ ይትባረክ ኣማሃ ሓዊሱ ኣመራርሓ ህወሓትን ኣባላት ህወሓት ነበርቲ ከተማ መቐለ ይሳተፉ ኣለዉ።
#ይብራህ_እምባየ

413 - 23

Tigrai Tv
Posted 2 weeks ago

ኣብ ክልተ ዝተመቐሉ ኣመራርሓ ህወሓት ነኒባዕሎም ምክሳስ ቀፂሎምሉ ይርከቡ።
ጉባኤ ዘካየዱ ኣመራርሓ እቲ ውድብ "ኣብቲ ጉባኤ ንዘይተሳተፉ 16 ኣመራርሓ ኣባሪርና ኣለና እንትብሉ:-
ካብቲ ጉባኤ ንባዕሎም ዘግለሉ ኣመራርሓ ድማ "ዘይሕጋዊ ጉባኤ ዘካየዱ ኣመራርሓ ነቲ ኻሊእ ከባርሩ ሕጋዉን ሞራላውን ስልጣን የብሎምን" ኢሎም ።

መቐለ፥ 8 መስከረም 2017 ዓ.ም (ቴሌቭዥን ትግራይ)
ኣብ ክልተ ጉጅለ ዝተመቐሉ ኣመራርሓ ህወሓት ነኒባዕሎም ዝካሰስሉ መግለፅታት ኣብ ምውፃእ ተፀሚዶም ይርከቡ።
ነቲ ጉባኤ ዘካየዱ ኣመራርሓ 6 መስከረም 2017 ዓ.ም ኣብ ዘውፅዎ መግለፂ ንምክትል ኣቦመንበር እቲ ውድብ ጌታቸው ረዳ ሓዊሱ ካብ መበል 14 ውድባዊ ጉባኤ ህወሓት ንባዕሎም ዘግለሉ 16 ኣመራርሓ ፤ " ካብቲ ውድብ ከምዝተባረሩን ንህወሓት ወኪሎም ምንም ዓይነት ስራሕ ክፍፅሙ ከምዘይኽእሉን ወሲና ኣለና" ኢሎም ።

ዓርሶም ካብቲ ጉባኤ ዘግለሉ ኣመራርሓ ድማ 8 መስከረም 2017 ዓ.ም ኣብ ዘውፅዎ መግለፂ "ንሕገ መንግስትን ሕገ ደንቢ እቲ ውድብን ብምጥሓስ ዘይሕጋዊ ጉባኤ ዘካየዱ ኣመራርሓ ንኻሊእ ከባርሩ ሕጋውን ሞራላውን ስልጣን የብሎምን" ብምባል "ዕልዋ መንግስቲ ብምክያድ ትግራይ መንግስቲ ኣልቦን ማእኸል ዕግርግርን ንምግባር መደብ ከምዘለዎም ግልፂ ገይሮም ኣለዉ" ኢሎም።

ብኻሊእ ወገን ነቲ ጉባኤ ዘካየዱ ኣመራርሓ "ካብ ሰራዊትን ዝተተክኡ ኣመራርሓን ብዝተውፃእፀአ ኮሚቴ ብዝተገበረ ምፅራይ ብገበን ግዕዝይና ዝጥርጠሩ ነበር ኣመራርሓ ተፈልዮም እዮም ። እቶም ብግዕዝይና ዝጥርጠሩ ናብ ሕጊ ክቐርቡን ተሓታትነት ክረጋገፅን ዝምልከቶም ኣካላት ፍትሕን ፀጥታን ሓላፍነቶም ክፍፅሙ ንፅውዕ" ኢሎም እዮም።

ዓርሶም ካብቲ ጉባኤ ዘግለሉ ኣመራርሓ ድማ ነቲ ጉባኤ ዘካየዱ ኣመራርሓ 50 ዓመት ዘቑፀረ ውድብ ህወሓት ከም ሓዱሽ ክምዝገብ ብምግባር መኸተ ትግራይ ዝኽሓዱ እዮም: ህዝቢን ዲያስፖራን ክቃለስዎም ንፅውዕ" ብምባል ሕጋዊ ሰውነት ህውሓት ንምምላስ ምስ ዝምልከቶም ኣካላት መንግስቲ ፌደራል ፖለቲካዊ ዘተ ከምዝጅምሩ ገሊፆም።

ብኣንፃሩ ብፕሬዝደንት ጌታቸው ረዳ እናተመርሑ ኣብ ዝተፈላለዩ ከተማታት ትግራይ ኣብ ዝተኻየዱ ህዝባዊ መድረኻት ዝተሳተፉ ክፋላት ሕብረተሰብ፤ ኣመራርሓ ህወሓት ኣፈላላዮም ኣፅቢቦም ህዝቢ ትግራይ ካብ ዝኣተዎ ፀገም ከውፅኡ ምፅውዖም ይዝከር።
ኣብ ሱዳን ኣፅሊሎም ዝርከቡ ስደተኛታት ተጋሩ 5 መስከረም 2017 ዓ.ም ኣብ ዘካየድዎ ሰለማዊ ሰልፊ መራሕቲ ስደተኛን ተመዛባልን ናብ መረበቱ ንምምላስ ልዕሊ ዝኾነ ይኹን ነገር ቀዳምነት ክህብዎ ምምሕፃኖም ዝፍለጥ እዩ።

ምክትል ፕሬዝደንትን ሓላፊ ካቢኔ ሰላምን ፀጥታን ግዝያዊ ምምሕዳር ትግራይ ሌ/ጀነራል ታደሰ ወረደ ፤ 4 ጳጉሜን 2016 ዓ.ም ኣብ ዝሃብዎ መግለፂ ጉባኤ ዘካየዱ ኣመራርሓ ህወሓት ግዝያዊ ምምሕዳር ንምቁፅፃር ክፍትኑ ከምዘይብሎም፣ ዓርሶም ካብቲ ጉባኤ ዘግለሉ ኣመራርሓ ህወሓት ድማ ኣብ መሓውር መንግስቲ ሽግሽግ ክገብሩ ከምዘይብሎምን ምግላፆም ይዝከር።

ዋና ዳይሬክተር ውድብ ጥዕና ዓለምን ነባር ኣመራርሓ ህውሓትን ዶ.ር ቴድሮስ ኣድሓኖም እውን 2 መስከረም 2017 ዓ.ም ንድወት ኣብ ዝሃብዎ ሪእቶ "መራሕቲ ህወሓት ዘለዎም ኣፈላላይ ሰላም ህዝቢ ብዘየፍርስን ብልዝብን ክፈትሑ ይግባእ" ምባሎም ይዝከር።
#ዛይድ-ተስፋይ

213 - 49

Welcoem to posts!!

Tigrai Tv Posted 2 days ago

Tigrai Tv Posted 2 days ago

Tigrai Tv Posted 3 days ago

Tigrai Tv Posted 3 days ago

Tigrai Tv Posted 3 days ago

Tigrai Tv Posted 4 days ago

Tigrai Tv Posted 1 week ago

Tigrai Tv Posted 1 week ago

Tigrai Tv Posted 1 week ago

Tigrai Tv Posted 2 weeks ago

Tigrai Tv
Posted 2 days ago

Tigrai Tv
Posted 2 days ago

Tigrai Tv
Posted 3 days ago

Tigrai Tv
Posted 3 days ago

Tigrai Tv
Posted 3 days ago

Tigrai Tv
Posted 4 days ago

Tigrai Tv
Posted 1 week ago

Tigrai Tv
Posted 1 week ago

Tigrai Tv
Posted 1 week ago

Tigrai Tv
Posted 2 weeks ago