Welcoem to posts!!
in the future - u will be able to do some more stuff here,,,!! like pat catgirl- i mean um yeah... for now u can only see others's posts :c
我們都上了人生寶貴一課。
我們真的很喜歡美食，更喜歡與大家分享美食背後的故事，所以總是有數之不盡的細節想和大家一起欣賞。
自創立這頻道的5年半以來，總是覺得自己拍得未夠好，總是想爭取更好的構圖、更詳盡嘅介紹、更獨一無二的資訊，每次一動筆寫稿就總是洋洋灑灑三四千字，但仍總覺意猶未盡。
衷心感激大家陪伴着我們一起經歷了300多條影片，感恩沿路都不斷有鼓勵和支持，與大家交流睇法，一起探討烹調手法、口味配搭、歷史演化、軼事趣聞等，各種和而不同的討論都幫助我們進步。這種緣份，是我們最珍而重之的！
近日有關文苑飯莊的食評風波引發的報道、留言、批評，我們都有一一細讀，沉澱了幾個星期，也想藉此分享一下我們的反思。
首先，我們希望再次鄭重澄清，我們曾經前後兩次到文苑飯莊用餐，第一次是參加朋友飯局，第二次是為家人辦壽宴，兩次都是自費，而非受餐廳邀請。餐廳對於我們拍攝後會否出片，有何評價，均從沒過問。片中對於餐廳出品的評論，一字一句都發自內心。
我們明白每一間餐廳營運起來都不容易，樓面與廚房伙計的努力不應被隻言片語輕易抹殺，所以面對餐廳有需要改善之處，我們會盡量用中肯而婉轉的講法來表達。
對於文苑飯莊的整體評語，我們在片中末段有總結道：不要因為有一眾名人到此用餐打卡，就被其「名人飯堂」的光環所吸引，導致出現過高的期望；文苑就只是一間中等價位的中菜，炮製出中等水準的餸菜出品。
而片中都有幾處指出其菜式有可以改善之處，例如脆鱔味道欠層次、鴨肉生菜包偏乾身、咕嚕肉口感偏實、小炒王偏鹹、蟹粉重薑、雞味淡薄、炒飯偏濕等等，不一一細數；
我們說得不夠直白，令大家有所誤會，是我們的問題。
至於用字與其他報道有相似之處，皆因店員上菜時都會介紹烹調手法；
菜式一樣，所用之食材及煮法都當然會是一樣，複述下來自然會有相似之處。
但我們確有做得不足之處，沒有令各位觀眾明確分辨出，哪些是邀請合作，哪些含有置入式廣告。
對於餐廳的付費邀請合作，我們會選擇以「入得廚房」系列的呈現方式作介紹，希望以拍出餸菜的炮製過程，令觀眾們明白師傅手藝的價值所在。
而在片中置入廣告的話，我們未來都會在影片下方的資訊欄提及本次需要宣傳的內容；以及在影片標題後方加上ft.贊助品牌的字句。各位觀眾可以此作為識別。
對於因為今次風波而離開了的觀眾，期待將來有機會再次吸引到你收看。
而對於由始至終都相信我們，支持我們，給予我們無盡鼓勵的觀眾，我們再次衷心說一聲：多謝你！
「我哋下條片再見！」
2.3K - 650
2023係我人生最值得回味嘅一年🫶🏻
有見證老闆不斷成長嘅甜😍
有湊仔湊到心力交瘁嘅酸🥹
有足足一年都夜不能眠嘅苦🫠
有感受到為人父母之重擔嘅辣🥲
養兒方知父母恩
更加懂得父母嘅攰 同埋被迫成長嘅堅強
老闆依家識行識走😼
下年就可以盡情帶住佢
周圍去探索新事物😎
所以2024
會係我前所未有咁期待嘅一年！
Happy New Year🎊🥂
1.3K - 28
願一代傳奇安息🕯️
名成利就者眾，敬業樂業者寡。我諗如果有去過富臨飯店食飯，相信都唔難見到一哥嘅身影。
一次半次嗰啲叫偶遇；幾十年如一日嗰啲叫堅毅。擁有如此盛名，仍然事必躬親，就算唔埋鑊煮埋一份，都喺樓面幫手招呼客人。試問仲有邊位廚藝泰斗級人馬，喺80幾歲高齡都依然每日落鋪工作？
隻身來港打拼，由廚房幫工捱到上去做經理；年屆50再華麗轉身，由廳面走入廚房研究點樣煮鮑魚；大器晚成，做到90歲依然永不言休
睇落雲淡風輕嘅幾句，係呢位傳奇所活出嘅燦爛人生。願一哥在遠方盡享美食，好好休息🙏🏻
1.4K - 42
Here I am🥹
諗起3年前開展「摘星之旅」呢個題材，我連究竟有冇人會有興趣睇都冇把握，更加唔好講話咩立志要拍成一個系列
唔經唔覺，呢個系列已經收錄咗超過50間餐廳，成為我頻道其中一個最招牌嘅系列！
而更加受寵若驚嘅係，今年有幸獲邀出席新加坡米芝連嘅頒獎典禮🥹原來深耕細作，真係有人會睇到🥹
如夢一場嘅經歷🫶🏻值得cherish every moment⭐️
2.2K - 97
今年嘅母親節，意義有啲唔一樣🫶🏻
開始習慣緊呢個咁有份量嘅角色
開始適應緊為人娘親之後嘅種種大不同
開始調節到個生理時鐘(即係唔洗瞓)
開始廚藝突飛猛進
亦都開始意識到 未來有咩生活變化
意味住以後出街拍拖，
隔離都有粒電力十足嘅燈膽💡
意味住想有啖好食嘅話，
前提係老闆要有覺好瞓先😴
意味住起碼要餵多佢幾年
起碼要同佢沖涼沖多幾年
起碼要氹佢瞓覺氹多幾年
起碼要關心佢生活上嘅甜酸苦辣幾十年
老闆嘅到來
係迫自己Be a Better Me嘅契機
要有夫子「每日三省吾身」嘅覺悟
亦都係一個
提醒自己每日都要活在當下嘅印記
娘親唔易做
願天下娘親，日日都快樂🥳
1.9K - 37
人哋話：「養兒一百歲 長憂九十九」
我依家先至養兒一百日😎
不過慶幸嘅係，
歡樂嘅日子遠遠多過憂愁嘅日子！
望住佢越嚟越淡定
俾幾枱人傳遞聖火咁樣輪流抱法
都竟然全程冇扭計😳
仲會眼甘甘望住你😂
適應力之強連我都被surprise到
望住佢條頸同四肢越嚟越有力
抬起頭係輕而易舉嘅事
反身已經做到8成
但反完之後掹唔返被壓住嘅手😂
呢樣嘢再要多幾日學習下先得
望住佢講嘢越嚟越多
每日咦咦呀呀
仲有埋抑揚頓挫🫨
而且依家鍾意用偉仔式眼神望住你
講兩句嘢又電下你咁樣
搞到每個嚟湊佢嘅人都愛不釋手😆
盡情享受依家呢段最「無憂無慮」嘅日子
唔洗驚佢學壞
唔洗驚佢跟唔上功課
唔洗帶佢出去放電
唔洗被佢頂嘴拗頸
唔洗每日諗要煮咩營養均衡餐
一切都仲係十分美好🫶🏻
長路漫漫
依家完咗頭一百日嘅新手村training
往後嘅育成進度就...多多指教喇❤️
1.7K - 47
長話短說：母子平安❤️
老闆係個7.24磅嘅肥仔🥹
我嘅心情係來回地獄又折返人間咁刺激🫣
一直都係plan住想順產，打埋無痛舒舒服服，入港怡醫院好似住幾日酒店咁樣生個肥仔，平安大吉出嚟𢭃利是
但我諗得太簡單喇
生仔原來真係要搵命搏
年初一係預產期，老婆喺傍晚開始陣痛，準時到不得了；
施施然入院，施施然check in，喺未係痛到懷疑人生之前就率先打咗無痛分娩；瞓醒第二朝食早餐、宮頸開始打開，一切so far都好順利
正當我以為生仔就係一件咁循序漸進、按步就班、無乜風險嘅事嘅時候，
老婆忽然開始發燒
唔係話高燒，但足以trigger到高啲嘅血壓，同埋個人都開始震，之後開始怕凍，同時bb個心跳都開始高於正常範圍嘅數值
成件事就好似chain reaction咁，一塊骨塊跌，忽然間喺短短一個鐘以內就去到bb心跳超過200次/分鐘
我全程：WTF？Why me? Why now? What happened?
主診醫生臨危不亂：李生，為求母子平安，緊急開刀好啲喎，睇嚟等唔切子宮頸再慢慢擴張
於是我就經歷咗人生中最惶恐不安、最手足無措、最方寸大亂嘅...唔知幾耐時間
(因為我唔記得睇鐘)
但已經耐到三魂唔見七魄嘅地步
(醫生後尾講返開刀過程大約廿分鐘左右)
就係咁，由「Yo!生仔咋嘛，洗乜驚呀？」，去到要經歷所有媽媽不敢想像嘅惡夢：食全餐(仲要喺私家食全餐添🤦🏻♂️)，個轉折過程係快到我個腦仲未處理得到，淨係可以勉強擠出啲笑容，揸實老婆隻手，用毫無說服力嘅震音嚟「安慰」佢：李老闆好快出嚟㗎喇🥹
直到有一下嬰啼，喺手術室中就好似平地一聲雷咁響，然後我就喊到隻狗咁喇(但唔知點解多多仲竟然笑得出🤷🏻♂️唔通啲麻醉藥high大咗?)
以上呢段經歷嘅總結，就係呢張得來不易、認真Once in a Lifetime程度嘅全家福🥹
老婆搵命搏，港怡嘅助產團隊就係佢條安全帶🙌🏻全靠王醫生、陳醫生、鄭醫生、同埋一眾無微不至嘅姑娘，我講多十萬次多謝都表達唔到我嘅感激之情🫡
放心，人一世物一世，今次生仔經歷我有記錄低嘅🫶🏻俾少少時間我定一定驚，同埋熟習下李老闆嘅到來先🤤
講住咁多先！我哋下條片再見👋🏻
7.1K - 573
兔年快樂啊各位🎊祝賀大家身體健康、財源滾滾、最緊要有啖好食😋
其實李老闆個預產期原本就係年初一🤫個個都問我係咪會上電視，但睇嚟個肚實在太好食好住，老闆唔捨得出嚟添😂
依家時刻處於戒備狀態，今個新年過得相當緊張刺激🥹唔知呢籮蟹幾時先倒瀉呢？
2.9K - 63
【意亂情迷🇮🇹】系列，係到目前為止，我最引以為傲嘅作品
今次我算係完全視如同洪水猛獸一般嘅YouTube演算法為無物，做盡所有同「熱門影片」背道而馳嘅嘢：
唔落啲嘩眾取寵嘅標題
唔去食玩瞓買打卡熱點排隊名店
條條片都半個鐘長度
專講啲睇見標題都會兜路走嘅歷史文化藝術題材
因為我想喺我最鍾意嘅國家，做一輯我自己都想一睇再睇嘅節目
而我無估到嘅係，呢啲題材竟然都會有人睇🥹
喂龐貝喎！一片頹垣敗瓦你都睇？
喂聖馬力諾喎！無人識嘅蚊型小國你睇嚟做咩呀？
喂成接近40分鐘嘅梵諦岡博物館導賞喎，你唔悶嘅咩？
每一次我唔抱期望，只為留個紀念嘅時候，係你哋嘅支持同鼓勵令我明白，
原來呢幾年以嚟，我真係可以默默累積到一班志同道合嘅觀眾朋友，去欣賞呢啲「偏門」嘅題材🥹
仲夫復何求呢？🫶🏻
(一時感慨姐😂呢個系列未完㗎，仲有威尼斯同米蘭呢兩個地方未講)
3.6K - 294
三十萬訂閱達成！🥳🥳
用咗4年時間
推出咗304條片
換嚟咗六千幾萬觀看次數
同埋300000個喜歡我嘅內容、願意keep住聽一個講嘢咁長氣嘅人，繼續去分享故事🥹
呢種緣份 係我幾生修來嘅福氣🫶🏻
仲有大約一個月嘅時間，我同老婆嘅人生又將會進入下一段充滿未知、但相信會係奇妙處處嘅旅程🥰到時頻道嘅update都應該會慢落嚟，但又會有新嘅題材可以分享俾大家～
感恩沿途有你哋嘅陪伴同支持！喺一個追求15秒短片嘅年代，會肯靜下心來去睇一條30分鐘長嘅片，會肯去欣賞一啲比較小眾嘅歷史文藝深度遊行程🥹你哋嘅每一個click、每一個share、每一個like & comment，都係推動我繼續不眠不休做好content嘅源動力！
我相信，深耕細作出嚟嘅作品，你哋感受到嘅💪🏻期待喺下一個里程碑，會繼續見到大家！
「我哋下條片再見👋🏻」
2.1K - 99
一個喜歡講歷史、講文化，多過鍾意講食嘅頻道
人生匆匆，以此留下少許足跡，也藉住這個channel尋找志同道合之友，何嘗不是一件賞心樂事？
兩個掹車邊90後，喜歡感受人生多過埋頭苦幹；
有【尋味老香港】系列，在觥籌交錯中，追憶一眾老字號昔日光輝
有【摘星之旅】系列，於衣香鬢影間，感受這個都市華麗典雅的一面
有旅行片、開箱片、露營片、種種生活點滴，有緣相遇的話，希望能為你生活添一份甜
- - - - - - - - - - - - - - - - - -
電郵：perfectcontinuouseat@gmail.com
IG：@perfectcontinuouseat_
- - - - - - - - - - - - - - - - - -
加入成為本頻道的會員：
youtube.com/channel/UCHoFileUAn9bi3wUHPgvOzw/join
Patreon每月贊助：
www.patreon.com/perfectcontinuouseat