@DrMennaAli

3 weeks ago

"زهقت من الحبوب اللي تحت الجلد في قورتي (الجبهه) ، وبجد يا منة، جربت كل حاجة بس مش بتروح. قوليلي أعمل إيه؟ 😓"

مش هنسى أبداً الرسالة دي لما جاتلي من صاحبتي، كانت محبطة جدًا وحاسة إن ثقتها بنفسها بتتأثر بسبب الحبوب دي. وحاولت كتير تخبيها بالميك آب بس بتظهر أكتر

قولتلها أنا فاهمة إحساس الإحباط ده، لأن أنا كمان مريت بيه لما طلعلي حبوب ف قورتي وقت الحمل

بعد ما حددت معاها إنها حبوب بكتيرية مش فطرية وديه نقطه مهمه جدا لازم تخدي بالك منها عشان تبدأي الروتين صح

قررنا نبدأ خطة علاج بسيطة بس نينجا🙂‍↔️

لما بدأت اعالج بشرتي، اكتشفت إن أهم خطوة في علاج مشاكل البشرة هي إنك تفهمي السبب الحقيقي ورا كل مشكلة وتحليه قبل ما تعالجي المشكله.

فشرحتلها إن السبب الأساسي لظهور الحبوب تحت الجلد في الجبهة هو

إن المسام بتتسد وده بيخلي البكتيريا تتجمع تحت الجلد وتسبب الحبوب دي ممكن

١- بسبب الزيوت اللي بتنزل من شعرك

٢- او بتستخدمي فاونديشن نوعه وحش

٣- او الجلد الميت بيتراكم لانك مس بتقشري بشرتك بانتظام

قولتلها هم خطوتين مهمين

١-هتغسلي بشرتك مرتين في اليوم بغسول فيه سالسليك أسيد.

٢-هتستخدمي رتينول أو أدابالين أو ماربلين أو ديفرين بليل على الحبوب

وخدي بالك من حاجتين

١- لو اول مره تستخدمهم ف لازم تدخلهم بالتدريج يوم اه ويوم لا فالبدايه لحد ما بشرتك تتعود عليهم

٢-متقلقيش لو الحبوب زادت في الأول، ده طبيعي جدًا بسبب فيتامين أ، بس المهم ميزدش عن 4 أسابيع

٣-لو عايزة تسرعي النتايج ، استخدمي سيروم بالسالسليك أسيد بالتبادل مع مشتقات فيتامين أ

(بس خلي بالك إن اليوم اللي تستخدمي فيه سيروم السالسليك يكون الغسول مفيهوش سالسليك)

٤-رطبي بشرتك كويس مرتين في اليوم. دي الخطوة اللي بشرتك هتشكرِك عليها بعد الروتين العنيف ده.

٥-وطبعا، واقي الشمس ضروري خصوصًا مع الروتين ده

لان هدفنا نعالج الحبوب وفي نفس الوقت نحافظ على حاجز البشرة.

بعد أسبوعين، بعتتللي رسالة وهي فرحانة،قالتلي الحبوب بدأت تختفي وبشرتي بقت ناعمه من غير الفسافيس ديه.

الحاجة اللي فرحتني أكتر إنها التزمت بالروتين ووثقت في كل النصايح اللي قولتها لها.

لو إنتِ كمان بتعاني من الحبوب تحت الجلد، جربي الروتين ده، وهتقولي دكتورة منة قالت.

النتايج هتبدأ تظهر من أسبوعين لأربع أسابيع، المهم الصبر والالتزام دول سر نجاح اي روتين

لو حاسة إنك لسه تايهه، ف ركزي فالفيديوهات الفتره الجاية لان هشرحلك كل حاجة خطوة بخطوة عشان توصلي للبشرة الصافية اللي بتحلمي بيها

22 |