Kömək olmadı yağışın, qarın,
Həsrətin alovu doya bilmədi.
Şairin bu səhvin, bu günahların,
Nə yağış, nə də qar yuya bilmədi.(1)
--------------------------------------------------------------------
Mərhəmət haçandan səhv olub axı,
Gəl indi başa sal, fələk zalıma.
Onun kefsiz günü kef olub axı,
O fələk acımaz mənim halıma.(2)
--------------------------------------------------------------------
Sınmış ümidləri təsəvvür elə,
Yıxılan bir evin dirəyi sınıb.
Şair də eyniylə yaşayıb belə,
Özü dik dayanıb ürəyi sınıb.(3)
--------------------------------------------------------------------
Elə sındırmısan sınan ürəyi,
Qışın şaxtası da dondura bilmir,
Adamın həsrətdən yanan ürəyi,
Bəxtinin şamını yandıra bilmir.(4)
--------------------------------------------------------------------
Danışım dərdimi qulaq as mənə,
Bir vaxt sevgim idi ən əsas mənə.
Nə qəbir gərəkdir, nə də yas mənə,
Mən elə sağ ikən ölən adamam.(5)
--------------------------------------------------------------------
Yar da imdadıma gəlmədi mənim,
Sevgimi mənimlə bölmədi mənim.
Bir nəfər qədrimi bilmədi mənim,
Dərd odur mən bunu bilən adamam,
Mən elə sağ ikən ölən adamam.(6)
--------------------------------------------------------------------
Ümidin ipləri tez-tez yığılır,
Yenidən arzular bir də doğulur.
İçim qan ağlayır, ürək dağılır,
Yalandan üzümdə gülən adamam,
Mən elə sağ ikən ölən adamam.(7)
--------------------------------------------------------------------
Şairi ağladıb gülən adamın,
Hər gecə ağlıma gələn adamın,
Məni ürəyimdən silən adamın,
Şəklinin tozunu silən adamam,
Mən elə sağ ikən ölən adamam.(8)
--------------------------------------------------------------------
Nə təbim qalıb day, nə də avazım,
Dinməyir əvvəlki o dinən sazım.
Qoymayın kədərli şeirlər yazım,
Güclə bir özünə gələn adamam,
Mən elə sağ ikən ölən adamam.(9)
--------------------------------------------------------------------
Əvvəlki təəssürat yarana bilmir,
Bəxtim elə yatıb, oyana bilmir.
Ürəyim heç kimə inana bilmir,
Mən daha sevməyin daşın atmışam.(10)
--------------------------------------------------------------------
Həsrəti bağrımı az qalıb yara,
Ayrılıq qəlbimə vursa da yara.
Yaxşı yol demişəm gedəndə yara,
Dalıyca gözümün yaşın atmışam.
Mən daha sevməyin daşın atmışam.(11)
--------------------------------------------------------------------
Yar da ayrılığın fərqinə varıb,
Yazıb ki, bu sevgi daha qurtarıb,
Mən alan üzüyü geri qaytarıb,
Hirsimdən qoparıb qaşın atmışam,
Mən daha sevməyin daşın atmışam.(12)