@Naya_FM

1 year ago

انا وحيد لأهلي على ست بنات متزوج وعندي اربع بنات اثنين منهم توأم وزوجتي كانت من اختيار أمي اختارتها لأنها يتيمة عمرها 14سنة ومقطوعة من شجرة امي قالت انه يتيمة وصغيرة افضل بنربيها على ايدنا ولأن اللي عندها اهل بتكثر مشاكلها وأنا عجبتني زوجتي ولكن كنت اكره شغلة وحدة بس فيها هي انها سكوتية ومابتحكي خالص لدرجة اني أحياناً افكرها خرسة... أنا طبيعة عملي أعمل في محافظة ثانية بعيدة شوي عن مكاني الأصلي وأسكن قريب من عملي وزوجتي تسكن مع أهلي كنت اغيب عن البيت بالأشهر و اروح لبيتي زيارات وبس اوصل فوراً تستلمني امي واخواتي بالشكاوي من مرتي بأنها تغلط على امي وتسيء معاملتها و مو مؤدبة وأنا كنت أصدقهم وأعنف زوجتي وكثير مرات كنت أضربها وأهددها بالطلاق حتى يتعدل سلوكها كانت تنكر و تحاول تدافع عن نفسها ولكني لا اصدقها وأأمرها تروح تبوس ايد امي وتطلب رضاها وألا تعتبر حالها مطرودة برات البيت وكانت ترضخلي فوراً وتسمع الكلام وتبوس ايد امي وترضيها لأنها يتيمة وماإلها حدا ولا أي مكان تروحله وحتى عمتها يلي ربتها توفت. وكنت كلما سافرت لشغلي و رجعت للبيت بلاقي نفس الموال مرتك سوت مرتك عملت لحتى بيوم من الأيام كنت بفترة زيارة لبيتي بس كنت عند صديقي اتصلت فيني اختي وقالت لي تعال شوف مرتك المحترمة كيف ضربت امك انا هون عصبت وماعدت شوف بعيوني ورجعت فوراً عالبيت و استقبلني اخواتي عم يبكن وأمي تبكي جن جنوني يوم شفت امي تبكي رحت لغرفتي لقيت الباب مقفول صرت خبط عالباب مشان مرتي تفتح ما فتحت ضليت اضرب الباب لحتى خلعتو كانت زوجتي بزاوية الغرفة حاضنة البنات وعم تبكي قلت لها سؤال و رد غطاه هالكلام يلي حكولي اياه صحيح صارت تبكي وسكتت كالعادة وانا تنرفزت من سكوتها صرخت عليها جاوبي ردي قالت اي نعم صحيح اقتلني وريحني وخلصني وهون انا من عصبيتي منها ماعدت شوف بعيوني مسكتها وصرت اضربها من دون رحمة حتى اني سحلتها من شعرها وإيدها خبطت بالطاولة وانكسرت صارت تصرخ من الألم وما تركتها اخذتها لعند امي ورميتها عند رجليها وقلت لها بوسي رجليها ولكنها من شدة ألمها كانت مو واعية على شي بس تصرخ وتتألم وهربت من البيت ودخلت على بيت الجيران ولحقتها لهناك وطلع جارنا يلي دخلت عنده قلتله خليها تطلع قال لي على جثتي تاخذها من بيتي يا تقتلني يا اقتلك وراح آخذها للشرطة و أخليها تشتكي عليك وعلى اهلك الظالمين ما بتخافو من الله لسه من يوم جبتو هالمسكينة على بيتكم وانتو نازلين فيها ضرب وبهادل ما بتتقوا الله قلت له خلص ناديلها خليها تجي ووعد مني إلك ما امد ايدي عليها بس خليها تجي...قال رح اسألها وإذا هي قالت اي بدها ترجع معاك مافي مشكلة وراح وبعد شوي رجع و معاه مرتي ومرته كانت عم تغطي راس مرتي بحجاب من عندها وأنا وكأني توني صحيت على حالي وشفت حالتها كيف مبهدلة طلعت بثياب البيت وجهها مورم وكله دم وتبكي وتقول مشان الله خدوني للدكتور ماعاد فيني اتحمل الوجع يمكن انكسرت ايدي هون انا قلبي وجعني عليها وأخدتها فوراً للدكتور وطلعت ايدها صايبها تمزق شديد وعالجها الدكتور وضمدها وعطاها مسكنات ألم وسألها كذا مرة اذا بدها تشتكي علي وهي رفضت ورجعنا عالبيت وهي ساكتة خالص ومباشرة من وصلنا راحت لعند امي وباست ايدها وطلبت منها السماح وراحت لغرفتنا ونامت وبعد شوي اجا جارنا وقال لي امشي نتمشى عاوزك بكلمتين ورحت معه قالي ترى حرام هيك معاملتكم مع مرتك مابيصير قلت له هي ضربت امي شو بدك اسكتلها؟ استغرب وقالي مرتك تضرب امك مستحيل.. وحكالي انه امي واخواتي بغيابي كتير عم يظلموا مرتي وانه كل الحارة بتعرف هالشي انا انصدمت وماصدقت وبعد كم يوم زرعت كاميرا بالبيت وكانت صدمتي كبيرة لما شفت امي كيف عم تعامل مرتي كأنها عبدة وخدامة بالبيت شفتها صفعتها على وجهها وشدت شعرها وكبت عليها كاسة ماء اقسم بالله ماصدقت انه امي الملاك يطلع منها هالشي رحت عالبيت وواجهت امي بكلشي قالت عم تتجسس علي روح الله يغضب عليك قلتلها صارلي سنين اضرب مرتي وكسرت ايدها وطلعتي انتي عم تتبليها وانتي يلي ظالمتيها واللي صدمني من امي اكثر واكثر سبب كرهها لزوجتي هو انها مابتجيب غير بنات... امي قالت انت وحيدي وتخيلت لمن ازوجك تعبيلي البيت ولاد يحملون اسمنا ومرتك كل سنة تجيبلي بنت و إذا بدك رضاي طلقها وتزوج قلت لها زواج بتزوج بس ما رح اطلقها وأيتم بناتي بعدين لو طلقتها وين بدها تروح وهي مقطوعة من شجرة مالها حدا.. قالت والله هذا العندي و إذا بدك تخليها بدك تسيبها تعيش خدامة عندي اخواتك البنات مدللات ومو خرج جعك ودعك بالبيت وكثر خيري مستحملة مرتك الهبلة قلت طيب مو بدك اياني اتزوج راح اتزوج وآخد لزوجتي وبناتي بيت لوحدهم وخلي الجديدة تعيش معك قالت لأ انا ما عندي كناين تطلع ببيوت لوحدها وهذا آخر كلام عندي و رضاي و غضبي عليك اذا ماتطيعني.. وعدتني انها راح تعاملها بما يرضي الله و ياجماعة انا من نوع مابقدر اتحمل غضب امي مستحيل لما تكون زعلانة مني بتسود الدنيا بعيوني وحتى اموري كلها بتتخربط وأنا حالياً خطبت ورح اتزوج مرة ثانية بس زوجتي الأولى مو مهتمة بزواجي عليها وزاد سكوتها اكثر من قبل حتى اني احاول اتطمن عليها لو احد عم يزعجها ماترد علي خالص وكأنها صارت مريضة. قبل كانت تنكر وتدافع عن حالها شوي أما حالياً تلتزم الصمت التام وحتى بناتي التوأم واعيات شوي اعمارهم ٥ سنين صايرات مثل امهن اسألهن اذا حدا يزعج امهن يسكتن وما يردن علي خالص خايف بالمستقبل امي ترجع تعذب زوجتي وأكون أنا المذنب لأني مقصر في حمايتها ولما احاول اقنع امي انو آخذ لمرتي بيت لوحدها تصير تتغضب وتدعي علي تقول انت ولد عاق والجنة تحت اقدام امك مو تحت اقدام مرتك... خايف من غضب امي وخايف من خطية مرتي الأولى.

10 |