Welcoem to posts!!
in the future - u will be able to do some more stuff here,,,!! like pat catgirl- i mean um yeah... for now u can only see others's posts :c
اخواتي واصدقائي
غايب عنكم بقالي فتره ... وانا اكره ما عليا إني اغيب كتير ولكن المرادي الغيبه هتفرحكم
الحمدلله فتحت معرض " ماتور جراچ "
مكان هيخلينا ناخد خطوه لقدام في صناعة المحتوي أولا وثانيا لتقديم الخدمات اللي كل البايكرز بيتمنوها وبيحتاجوها
" موتوسيكلات واسكوترات جديده ومستعمله - اكسسوارات وسيفتي - صيانه"
وبعيداً عن كل ده ... احنا وصلنا للمرحله دي بفضل ربنا ثم دعمكم وثقتكم الغاليه ... فخليك متأكد إن ده بيتك التاني تقدر تنورني في أي وقت بذات لو عندك استفسار ف حاجه معينه او محتاج ترشيحات
هنرجع بالفيديوهات والفلوجات تاني وهنكسر الدنيا مع بعض ❤️💪
دعواتكم بالتوفيق
عنوان المعرض : ٣٦ ش مكه زهراء المعادي القاهره - بجوار مسجد آل إبراهيم
لوكيشن : maps.app.goo.gl/o8GFazBwHRVzmYWN8
475 - 67
٥ نصايح لازم تعرفها قبل ما تسافر بالموتوسيكل بتاعك :
• أول واهم نصيحه هي انك تنظم نفسك
من أول مواعيد التحرك - السرعه اللي هتمشي عليها - عدد الاستراحات وهتريح كل قد ايه.. كل ده بيخلي الرحله ممتعه اكتر ولو قلبت بعشوائيه هتحس انك تايه وهتزهق من الطريق
• صيانة الموتوسيكل قبل السفر " مراجعة منسوب الزيت - ظبط سلك الدبرياج والبنزين - تشيك علي كل حاجه ف البايك لأن ابسط حاجه ممكن تعطلك عادي "
• مش هقولك لازم تكون صنايعي وبتعرف تتشقلب ف المكنه علشان لو عطلت تقدر تساعد نفسك ... لو كدا يبقا محدش هيسافر - ولكن حاول يبقا عندك الحد الادني من التعامل مع العده وفاهم بتربط وتفك ازاي يعني يبقا عندك فكره بسيطه ويكون في تواصل بينك وبين حد بيفهم ف الصيانه علشان لو عطلت ع حاجه وانت ع الطريق يوجهك بالتلفون حتي
• طبعاً لازم يكون معاك برضو الحد الادني من العدد " لقم - مفاتيح - مفكات .... الخ
• السفريات والمسافات الطويله بتتاخد تدريجي - يعني مثلاً لو أول مره تجرب خدلك سفريه ١٠٠ كم واقعد زود واحده واحده - لكن متجيش تاخد سفريه ٦٠٠ كم مره واحده وانت لسه أول مره تجرب .. السفريات الكبيره بتحتاج خبره شويه ف بعض الحاجات واللي هتكلم فيها برضو الايام اللي جايه .
وأخيرا انا مش مثالي ومش شرط اكون بطبق كل الحاجات دي بنسبة ١٠٠٪ ولكن بحاول دايما اتجنب إني ابوظ علي نفسي سفريه كنت طالع استمتع بيها - ربنا يسترها علينا وعليكم ❤️
289 - 11
في ظاهره غريبه بالنسبه لمعظم الناس لكنها مش غريبه بالنسبالي وهي إني بنام وانا مسافر بالموتوسيكل وسايق ! .. ايوا زي ما قريت كدا 😅
وده حصل معايا دلوقتي وانا راجع من مطروح
مع إن المفروض سواقة الموتوسيكل تفوق أي حد لانك مش قاعد قعده مريحه والهوا خابط ف وشك مفوقك
لكن للأسف الجسم بيكون خلاص فصل وهينام يعني هينام ...
سواء شربت قهوه - استريحت شويه - غسلت وشك .. ولا أي حاجه هتاثر
والحل هنا إني بقف ع جمب ف أي حته من الطريق واسحب المصليه اللي بقعد عليها ع طول ف السفريات وافرشها وانام ١٠ دقايق - ربع ساعه
و بلاقي نفسي فوقت بعدها وقادر اكمل الطريق
الحقيقه ده بيكون بسبب خطأ مني إن سفريات كتير بطلعها وانا مش نايم عدل وعلشان كدا بقول دايما ان اهم حاجه تنام كويس قبل ما تسافر لأني اكتر واحد بتضر من القصه دي ومش عارف اظبطها 🤦♂️
ف العموم كل جسم وليه طبيعته مش كل الناس كدا ... الفكره بس انك متسيبش نفسك للنوم علشان متتقلبش وانت سايق 😃
363 - 28
السفر بالموتوسيكل متعب ؟ ... اه ومكلف كمان عن لو حجزت باص مثلاً
ولكن ده ف حاله واحده وهي انك رايح مكان وهتفضل ثابت فيه ..
انما بقا لو هتروح مكان وفيه تحركات داخليه كتير فالموتوسيكل طبعاً هيكون افضل واوفر واريح ❤️
طبعاً غير متعة الطريق نفسه وانت مسافر بذات لو ف وقت الفجر كدا ✨
اليومين الجايين هنزل بوست كل يوم بخصوص السفر بالموتوسيكل سواء نصايح او حاجات تخلي بالك منها
انا بحب اسافر بالموتوسيكل بتاعي أيا يكن نوعه ايه ولازم احببكم فيه ♥️
348 - 11
في ناس سألتني انا مجيبتش زونتس T350 ليه ؟
حابب اقولكم إن هو نفس السبب اللي خلاني مجيبش الBMW S1000
215 - 17
الـF250 اللي كان نازل بمواصفات تعتبر عاديه ونجح لمجرد إنه شكله حلو وبيجيب سرعه ترضي الشباب وسعره يعتبر مش غالي...
بالحاجات البسيطه دي بقا الموتوسيكل رقم 1 مبيعا يعتبر
تخيل بقا إن نفس الموتوسيكل ينزل بفانوس ليد ومساعد نص مع تبريد زيت وشوية دلع زياده
غالباً الموتوسيكل ده هيكتسح السوق لو نزل قريب
ونصيحه مني لو انت عندك قرار شرا للموتوسيكل ده اشتريه اول ما ينزل لأنه لما بيقعد شويه وعليه اقبال كتير سعره بيرفع مع الوقت
كلامي ده مش تشجيع انك تشتريه او متشتريش لكن ده وصف لحال السوق 👌
82 - 6
اصدقائي واخواتي ... انا عارف مقصر جامد في آخر فتره
لظروف خارجه عن ارادتي مكنتش قادر انزل حاجه ع القناه مؤخراً ...من الظروف دي إن الجهاز اللي بشتغل عليه اتهكر وكنت بعالج الموضوع
إن شاء الله راجعلكم راجعه نار 🔥 بفيديوهات نار 🔥
أهم حاجه دعمكم وكومنتاتكم اللي بتخش قلبي دي ❤️
هنسخن انهارده بفيديو مراجعة الكافينيرو سبورت هينزل الساعه ٨:٣٠ م والباقي جاي ف السكه " تجربة قيادة tnt250 - وسافرت اسكندريه صد رد - و فيديو احسن موتوسيكلات للسفر ....
كل ده واكتر هينزل قريب إن شاء الله
فانت قولي متحمس لانهي اكتر حاجه 😍
230 - 22
شوية نصايح لازم تعرفهم قبل ما تسافر بالموتوسيكل بتاعك علشان لو هبت معاك تسافر ف أي وقت 🫣❤️
حرفياً البوست ده مرجع ليك ... ارزعني القلب الجميل ويلا بينا 🤙
أول وأهم معلومه وهي إن السفر بالموتوسيكل هو للمتعه في المقام الاول ... يعني ولا لتوفير الفلوس او علشان هو اسرع مثلاً من العربيات ... وبالتالي علشان تاخد احسن تجربه وتستمع بالسفريه لازم تكون مجهز نفسك كويس من الحاجات اللي هقولك عليها دلوقتي :
- صيانة الموتوسيكل بشكل كامل وتتأكد إن مفهوش مشاكل
- اختيار التوقيت المناسب للسفر " لو شتا بالنهار هيكون أفضل" " ولو صيف بلليل هيكون أفضل" وعموما أحسن وقت في السنه بيكون الربيع او الخريف
- تختار اللبس المناسب للجو ولو الجو ساقع لازم تتقل كويس جداً جداً ويفضل انك تلبس ووتر بروف و الافضل برضو انك تسافر بالنهار في الشتا
- تفتح خرائط جوجل قبل ما تتحرك وتشوف اماكن البنزينات فين والاستراحات علشان تعمل حسابك ولو سفريه بعيده واول مره تطلع ع الطريق بتاعها حاول تكلم حد يكون خد نفس الطريق واكيد هيفيدك كتير + لازم تشوف الاحوال الجويه في اليوم اللي هتتحرك فيه عامله ازاي لأن ممكن يصادف مع ظروف جويه لاتصلح للسفر
- تحدد لنفسك خط سير وميكونش التحرك والاستراحات بشكل عشوائي لانها بتقلب بفرهده ف الآخر: أفضل سيناريو " بالنسبالي " هو إني اريح كل ٨٠ او ١٠٠ كم لمده من٢٠ لـ ٣٠ دقيقه ولو سفريه بعيده ممكن اريح كل ١٢٠ كم وهكذا
- السيفتي وهنا ليه كذا فايدة مش قصة امان بس ...
انت لو هتسافر من غير خوذه هتتعب جامد وكل ما كان عزل الخوذه اللي انت لابسها اقوي هتاخد تجربة سفر أفضل + الجاونتي طبعاً أقل الايمان علشان لولا قدر الله حصل أي حاجه يحوش عنك الوقعه غير انه هيدفيك ف الشتا اكيد
- وأخيراً ... خد معاك أي حاجه ممكن تحس انك هتستعملها الطريق من أول العده لمستلزمات شخصيه وأكل وشرب وبلاش تتقل في الاكل قبل أي سفريه او حتي وانت ع الطريق لأنه هيتعبك شويه
البوست ده لازم تحفظه عندك وتراجعه قبل ما تطلع أي سفريه عقبال ما نعمل فيديو إن شاء الله ❤️
247 - 8
المنظر ده عمري ما هنساه !
من اكتر من سنه وانا راجع من واحة سيوه لمرسي مطروح مسافة ٣٠٠كم
كنا المفروض نتحرك بالنهار في النور لكن اتأخرنا وخدنا الطريق بلليل
تقوم الدنيا ممطره علينا واحنا ماشيين ... بس كدا ؟ لازم يبقا في اكشن اكتر
قبل اخر ١١٠كم لبست حفره شرختلي الجنط الامامي والفرده جت ع الأرض
تخيل تبقا ف الموقف ده ف قلب الصحرا وأقرب خدمات بالنسبالك ع بعد ١٠٠كم ومفيش شبكه ولا في حتي عربيات رايحه جايه 😅
قولت مبدهاش بقا واتحركت علي هذا الوضع وكنت فاكر إني هبقا مضطر اكمل ع سرعه هاديه ٥٠...٦٠ مثلاً لكن اكتشفت وقتها إني لما همشي ع سرعه عاليه شويه الفرده وزنها بيخف من ع الأرض وكذلك الموتوسيكل طبعا والسواقه بتبقا أسهل
والحمدلله وصلت بالسلامه وكنت في قمة السعاده إني وصلت .. فطلعت الكاميرا وخدت الصوره دي لذكري عمري ما هنساها ❤️
246 - 19
يا أخي الموتوسيكل ده رخم بشكل ..😂
من اول ما اتقال انه هينزل الناس فضلت مستنياه سنه كامله وبعدها نزل..
وبعد ما نزل عمل ضجه مش طبيعيه بسبب اسمه "هوندا وايانج "
وبرضو اختفي سنه كامله من السوق وقولنا مش هينزل تاني
وده خلاني قولت اوعي حد يشتريه علشان قطع غياره هتنقص جامد
لكن يسكت ؟
يرجع ينزل تاني اليومين دول وفي الحاله دي الواحد مبقاش عارف يقول نشتريه ولا لا البايك كويس إلي حدٍ ما "كإمكانيات " ولكن
التخوف كان من نقص قطع الغيار
عموماً خلينا نشوف لغايت اما نعمله تجربة قياده 👌
220 - 11
انا معاذ سعد وبحب السفر والموتوسيكلات وبقدم في القناه المحتوي اللي يجمع بين الاتنين ❤️