Zahidin olmasa təqvası, libasında nə var?
Elə bil qoymusan əmmamə müqəvva başına.
Mahir
Sevgilim, bikəsü-məzlumların ahından qorx!
Yıxılar zülm evi məzlum eliyən aha görə.
Vahid
Eyləsən tutiyə təlimi-ədayi-kəlimat,
Nitqi insan olur, əmma özü insan olmaz!
Füzuli
Sən xəbərdar olduğunçün hər gün, ahımdan mənim,
Var ümidim ki, keçərsən hər günahımdan mənim.
Azər
Çox adam şikayət eylər, gecə dərd şiddət eylər,
Gecədən nə fərqi var ki, günümüz qəra deyilmi?
Əşrəf
Bilmirəm, zülfün üçün şanəni xəlq etdi Xuda,
Ya ki, zülfi-siyəhin xəlq eləyib şanə üçün.
Seyyid Əzim
Yazmışam kipriyinə namə, cavab gözləyirəm,
Bağrımın başını qeyd etmişəm ünvan yerinə.
Arif
Dərk eylə, Kamal, birdəfəlik diz çökəcəksən,
On yeddi dəfə dəyməsə hər gün yerə dizlər.
Kamal
Zülmün üzünə "Haqq" deyilən şilləni çəksən,
Şilləndə möhürlənmiş o qeyrətdədir ALLAH!
Bəxtiyar
Kişi oldur ki, sözüylə ola uyğun əməli,
Fəqihin dəysin odur verdiyi fətva başına.
Ümmi